SSV: SHHT sammiti kunlarida Samarqand shahri aholisiga uzluksiz tibbiy yordam ko‘rsatiladi

Samarqand shahrida 15–16-sentabr kunlari bo‘lib o‘tadigan Shanxay hamkorlik tashkilotining O‘zbekiston mezbonligidagi navbatdagi sammiti davomida shahar aholisiga uzluksiz tibbiy yordam ko‘rsatiladi. Bu haqda Sog‘liqni saqlash vazirligi matbuot xizmati xabar berdi.

Sammit kunlari davomida Samarqand shahrida tibbiy yordam 3 yo‘nalishda tashkil etiladi:

• tez tibbiy yordam ko‘rsatish;
• ambulator yordam ko‘rsatish;
• shifoxonada shoshilinch tibbiy yordam ko‘rsatish.

Shahar aholisiga 50 ga yaqin tez tibbiy yordam mashinasi va shuncha tibbiy brigada jalb etilgan bo‘lib, ular chaqiriqlar bo‘yicha odatdagidek faoliyat olib boradi. Ambulator yordam ko‘rsatish uchun Samarqand shahri tibbiyot birlashmasiga qarashli barcha oilaviy poliklinikalarda odatdagidek soat 8:00 dan 20:00 gacha ish faoliyati olib boriladi.

Shuningdek, har bir mahalla fuqarolar yig‘inida aholiga tibbiy xizmatni yaqinlashtirish maqsadida oila shifokorlari va 2 nafar hamshiradan iborat tibbiy punktlar tashkil qilingan. Ular birinchi yordam uchun zarur dori-darmon vositalari bilan ta’minlangan bo‘lib, bu orqali yengil darajadagi bemorlarga mahallaning o‘zida ambulator yordam ko‘rsatish ta’minlanadi. Shoshilinch holatlarda 103 xizmatiga murojaat qilinadi!

Konservativ davolanishga muhtoj bemorlarga tuman shifoxonalarida ixtisoslashtirilgan tibbiy yordam ko‘rsatish uchun viloyat shifoxonalarida faoliyat ko‘rsatuvchi malakali mutaxassislar jalb etiladi. Bundan tashqari, shoshilinch va kechiktirib bo‘lmaydigan holatlarda mobil tez tibbiy yordam brigadalari tomonidan viloyat shifoxonalaridan malakali mutaxassislar tuman va shahar birlashmalariga yuborilib, shu joyning o‘zida shoshilinch operatsiyalar o‘tkazish imkoniyatlari yaratiladi. Bu boradagi barcha harakatlar vazirlik tomonidan Samarqand viloyat sog‘liqni saqlash boshqarmasida tashkil etilgan markaziy shtab orqali boshqarib boriladi.