“Real” 2021/22-yilgi mavsum bo‘yicha moliyaviy hisobotni e’lon qildi.

Madrid klubi 2020-yil mart oyidan buyon koronavirus pandemiyasi tufayli 400 million yevro yo‘qotgan bo‘lsa-da, ushbu moliyaviy yilni 13 million yevro daromad bilan yakunlaganini ma’lum qildi.

“‘Real’ pandemiya boshlanganidan keyingi uch yilni daromad bilan yakunlashga muvaffaq bo‘ldi. 2019/20-yilgi mavsum soliqlardan keyin 313 ming yevro, 2020/21-yilda esa soliqlardan keyin 874 ming yevro foyda bilan chiqqan edi. Jamoa ushbu yillar davomida moliyaviy yo‘qotishlarga uchramagan kam sonli Yevropa top-klublaridan biriga aylandi”, — deyiladi bayonotda.

Mana shu yillar ichida “qaymoqranglilar” klubning sof aktivlari qiymatini oshirishga muvaffaq bo‘ldi. 2022-yil 30-iyun holatiga ko‘ra, u 546 million yevroga yetdi.

“Madrid”ning operatsion foydasi o‘tgan yilgiga nisbatan 10 foizga (69 million yevro) oshdi. Hozir esa u 722 million yevroni tashkil etadi.

“Real Madrid”ning naqd pul qoldig‘i 2022-yil 30-iyun holatiga ko‘ra 425 million yevroga yetdi. “Santyago Bernabeu”ni ta’mirlash loyihasi xarajatlarini hisobga olmaganda, madridliklarning sof qarzi 263 million yevroni tashkil etadi.