Toshkentda fuqaro psixotrop dorilar va salkam 2 kg giyohvand modda saqlab kelayotgani aniqlandi

Toshkent shahri Yangihayot tumanida kuchli ta’sir qiluvchi dori vositalari muomalaga kiritilishining oldi olindi, deb xabar bermoqda Iqtisodiy jinoyatlarga qarshi kurashish departamenti.

Ma’lum qilinishicha, Bosh prokuratura huzuridagi departamentning Yangihayot tumani bo‘limi tomonidan Toshkent shahri IIB bilan hamkorlikda tezkor tadbir o‘tkazilgan. Unda “Barkamol” MFYda yashovchi fuqaro M.R. o‘z xonadonida 198 dona “Regapen” va 6 dona “Tropikamid” nomli kuchli ta’sir qiluvchi dori vositalari hamda 1,8 kilogramm “Mefedron” nomli kristall-kukunsimon moddani o‘tkazish maqsadida saqlab kelayotgani aniqlanib, ashyoviy dalil sifatida olingan.

Mazkur holat yuzasidan Jinoyat kodeksining 251-1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.