O‘zbekiston — iqtisodiy jihatdan jadal rivojlanib kelayotgan zamonaviy davlatdir. So‘nggi yillarda respublikamizni yirik qurilish maydonchasiga qiyoslashmoqda. Va bu bejiz emas. Chunki qisqa vaqt ichida minglab yangi inshootlar – sanoat korxonalari, turar-joy binolari, ijtimoiy soha obyektlari qad rostladi.
Qurilish sanoati esa eng jadal rivojlanayotgan sohalardan hisoblanadi. Prezident Shavkat Mirziyoyev tashabbusi bilan “O‘zbekiston Respublikasi qurilish sohasi xodimlari kuni” e’lon qilinishi, amalga oshirilayotgan bunyodkorlik ishlarini jadallashtirish yo‘lida har kuni mehnat qilib kelayotgan insonlarga nisbatan ko‘rsatilayotgan e’tibor va ehtirom namunasiga aylandi.
Enter Engineering kompaniyalar guruhi mehnat jamoalarida ushbu kasb bayramni keng nishonlash yaxshi an’anaga aylangan.
Bu yilgi bayram tantanalari OTMK negizidagi 3-MBF, Boysun GQIZ, Samarqanddagi Silk Road Samarkand sayyohlik markazi va kompaniyaning boshqa obyektlaridagi qurilish maydonlarida bo‘lib o‘tdi.
Kompaniya obyektlarida ishlayotgan barcha xodimlar uchun bu kun unutilmas taassurotlar, yorqin voqealarga boy bo‘ldi. Joylarda loyiha rahbariyati vakillari tabrik nutqi bilan so‘zga chiqib, har bir xodimning umumiy ishga qo‘shgan unumli hissasi, murakkab tabiiy sharoitlarda mehnat qilgan holda zimmalaridagi vazifalarni muvaffaqiyatli amalga oshirib kelayotgan mutaxassislarning samarali mehnatini e’tirof etdi.
Ilg‘or ishchilar diplom va qimmatbaho sovg‘alar bilan taqdirlandi, bayramona dasturxon atrofida jam bo‘lib, quruvchilar kunini ko‘tarinki kayfiyatda o‘tkazdi. San’at ustalarining jo‘shqin kuy va qo‘shiqlari bayram oqshomiga fayz kiritdi.
Shuni ishonch bilan aytish mumkinki, bugungi kunda kasb nufuzi yangi sifat pog‘onasiga ko‘tarilmoqda va Enter Engineering kompaniyasining har bir xodimi ishonch bilan “Quruvchilik — faxrli kasb” deyishi mumkin.
Izoh (0)