Isroil G‘azoga zarba berishda davom etmoqda, Falastin tomoni 15 kishi halok bo‘lganini ma’lum qildi — so‘nggi ma’lumotlar

Isroil G‘azodagi harbiy amaliyotini davom ettirmoqda, Falastin tomoni 15 kishi halok bo‘lganini ma’lum qildi, mamlakat janubida esa sirenalar yangramoqda.

Isroil mudofaa vaziri Benni Gants 6-avgust kuni ertalab G‘azo sektorida “Islomiy jihod” harakatiga qarshi harbiy operatsiya davom etayotganini ma’lum qilgan. Isroil armiyasi, shuningdek, operatsiya bir hafta davom etishiga tayyorgarlik ko‘rayotganini bildirgan.

Operatsiya o‘zi qanday boshlandi?

Mojaroning keskin bosqichi bir kun avval Isroil armiyasi G‘azo sektorida “Tong” operatsiyasini e’lon qilganidan so‘ng boshlandi. Tez orada Isroil “isroillik tinch aholiga qarshi ko‘plab teraktlar uchun mas’ul bo‘lgan” “Islomiy jihod” qo‘mondoni Taysir Jabariy o‘ldirilganini e’lon qildi. Falastin tomoni ham bu xabarlarni tasdiqladi.

Bunga javoban G‘azo Isroilni o‘qqa tutdi — 5-avgust kuni kechqurun mamlakat janubida havo hujumi sirenalari yangradi, keyin osmonda Isroilning “Temir gumbaz” raketalarga qarshi mudofaa tizimi tomonidan urib tushirilgan raketa izlari paydo bo‘ldi.

Hozir vaziyat qanday?

6-avgust kuni tushdan keyin har ikki tomon zarba berishda davom etdi. Times of Israel nashriga ko‘ra, 15 kishi halok bo‘lgan, 125 kishi yaralangan, jumladan, ayollar va bolalar. Isroil armiyasi vakilining aytishicha, zarbalar faqat qurol do‘konlari, qurol-yarog‘ omborlari va “Islom jihodi” guruhining o‘t ochish pozitsiyalariga berilgan.

Isroilda, so‘nggi ma’lumotlarga ko‘ra, G‘azo bilan chegaradan 10 kilometr uzoqlikdagi Ashkelon va Netivot hududlarida sirenalar hamon yangramoqda. Juma kunidan beri, Times of Israel nashrining yozishicha, mamlakat hududiga 200 dan ortiq raketa uchirilgan.