Dunyodagi eng yirik suvosti kemasi “Dmitriy Donskoy” Rossiya flotidan chiqarilgani xabar qilindi. “TASS” manbalari esa kema yil oxirigacha xizmatda qolishini aytmoqda
Dunyodagi eng yirik atom suvosti kemasi “Dmitriy Donskoy” Rossiya dengiz floti tarkibidan chiqarildi. U utilizatsiya qilinadi, deya xabar bermoqda “RIA Novosti” harbiy-sanoat majmuasidagi manbaga tayanib.
Agentlik suhbatdoshining aytishicha, “Dmitriy Donskoy” nomi 2021-yildan beri qurilayotgan “Borey-A” sinfidagi boshqa bir strategik yadro suvosti kemasiga berib bo‘lingan. Uning ishga tushirilishi 2025-yilga mo‘ljallangan.
Ammo “TASS” “Rossiya shimolidagi kemasozlik sanoati va huquq-tartibot idoralari”dagi manbalariga tayanib, “Dmitriy Donskoy” suvosti kemasi dengizda jangovar tayyorgarlik vazifalarini bajarayotgani va uning keyingi taqdiri bo‘yicha qaror 2022-yil oxirida qabul qilinishi haqida xabar berdi.
“Dmitriy Donskoy’ning Rossiya dengiz flotidan olib chiqilishi haqidagi so‘nggi xabarlar haqiqatga to‘g‘ri kelmaydi. U kamida yil oxirigacha jangovar tarkibda qoladi”, — dedi “TASS” suhbatdoshlaridan biri.
TK-208 “Dmitriy Donskoy” og‘ir yadroviy suvosti kreyseri 1981-yilda SSSR flotining jangovar tarkibiga kirgan. Suvosti kemasi 941 “Akual” loyihasining (NATO tasnifi bo‘yicha — SSBN Typhoon) yetakchi suvosti kemasi hisoblanadi, loyiha doirasida jami oltita qayiq qurilgan. Bu hajmi (48 ming tonna) bo‘yicha dunyodagi eng katta suvosti kemasidir.
2002-yilda suvosti kemasi “Bulava” qit’alararo ballistik raketasini sinovdan o‘tkazish uchun modernizatsiya qilindi. “Bulava-M” raketasi sinovlarida ishtirok etishi uchun “Dmitriy Donskoy” kamida 2020-yilgacha foydalanishdan chiqarilmasligi xabar qilingan edi.
