Defolt bo‘lgan Shri-Lanka oziq-ovqat yordamiga murojaat qilmoqda
Shri-Lanka o‘z qo‘shnilaridan oziq-ovqat yordamini so‘ramoqda, chunki mamlakatning qarz inqirozi gumanitar favqulodda vaziyatga aylanib bormoqda. Bu haqda Financial Times xabar berdi.
Hukumat Janubiy Osiyo mintaqaviy hamkorlik assotsiatsiyasi tomonidan boshqariladigan oziq-ovqat bankidan yordam so‘ramoqda. Ushbu bank oziq-ovqat inqirozi paytida a’zo davlatlarga guruch va boshqa asosiy mahsulotlar yetkazib bergan.
Shri-Lankaning oziq-ovqat bo‘yicha komissari Krishnamurti Financial Times nashriga uning bo‘limi ariza berish jarayonini boshlaganini ma’lum qildi.
Arizada Shri-Lanka o‘rta daromad darajasi yuqori bo‘lgan, qo‘shnilari orasida eng gullab-yashnagan mamlakatdan xayr-ehsonlar, oziq-ovqat, dori-darmon va yoqilg‘i uchun favqulodda kreditlarga qaram bo‘lgan mamlakatga aylanib borayotganini ta’kidlangan.
O‘tgan oyda 50 mlrd dollardan ortiq xalqaro qarzlarini to‘lamagan mamlakat tashqi zaxiralari amalda tugab qolgani uchun zaruriy tovarlarning keskin tanqisligidan aziyat chekmoqda.
Yoqilg‘i taqchilligi elektr stansiyalari yopilishi sababli uzoq vaqtlik uzilishlarga olib keldi. Shifoxonalar esa dori-darmon yetishmasligi sababli davolanishni kechiktirmoqda.
Yordam guruhlari yuqori inflyatsiya tufayli ochlik inqirozi kuchayishi haqida ogohlantirmoqda.
BMT Taraqqiyot dasturining Kolombodagi doimiy vakili Robert Juxkamning aytishicha, Shri-Lanka oziq-ovqatning katta qismini o‘zi to‘lay olgan bo‘lsa-da, vaziyat shu darajada yomonlashganki, mamlakatga bepul yordam zarur bo‘lib qolgan.
Prezident Gotabaya Rajapaksa o‘tgan yili to‘satdan kimyoviy o‘g‘itlarni taqiqlaganidan so‘ng, hosildorlik keskin pasaydi.
Qaror tezda bekor qilindi, ammo ilgari o‘zini-o‘zi ta’minlashga qodir bo‘lgan Shri-Lankada guruch importi o‘shandan beri 368 foizga oshdi.
Shri-Lanka zudlik bilan boshqa davlatlardan yordam so‘ramoqda. Hindiston bu yil kredit liniyalari va valyuta almashinuvi orqali 3 mlrd dollardan ko‘proq mablag‘ ajratdi. Xitoy esa bir necha yuz million dollar kredit taklif qildi.
Avvalroq Shri-Lanka Osiyo-Tinch okeani mintaqasidagi XXI asrda defolt bo‘lgan ilk davlatga aylangan edi.
