Jinoyat ishlari bo‘yicha Andijon shahar sudi tomonidan akasining ishlagan pulini talab qilib, quruvchi bilan janjallashishi oqibatida uning sherigini pichoqlagan yigitga sud hukmi o‘qildi. Bu haqda “Daryo”ga Andijon viloyat sudi axborot xizmati xabar bermoqda.
Aniqlanishicha, sudlanuvchi S.U. 2021-yilning 20-noyabr kuni soat 16:30 larda Andijon shahrida A.E. bilan Matiz avtomashinasi ichida o‘zaro pul oldi-berdi masalasida kelisha olmasdan janjallashib ketgan. Shu paytda ularni ko‘rgan B.Y. ajratish maqsadida yerdan tosh olib, S.U.ni urmoqchi bo‘lib, tashlangan vaqtida qo‘lida bo‘lgan pichog‘i bilan uning qorin qismiga bir marotaba sanchib olib, og‘ir tan jarohati yetkazgan.
“2021-yilning oktabr oyida Nusrat bilan Rustamning xonadonida birga ishladik. Lekin Nusrat o‘n uch kundan keyin, ish tugamasidan Rossiya ketib qoldi. Ish haqini hisob-kitob qilganimizda unga 1 million 360 ming so‘m berishimiz kerak bo‘lgan. O‘sha paytda uy egasidan so‘raganimizda qurilishni tugatganimizdan keyin berishini aytdi.
Shunda Nusratga pulni olishim bilan oilasiga yetkazib berishga va’da qildim. Biroq hech qancha o‘tmasdan, avval Nusratning turmush o‘rtog‘i, keyin ukasi qo‘ng‘iroq qilib, pullarni berishni talab qila boshlashdi. Holatni yotig‘i bilan tushuntirsam ham, tushunishni istashmadi. Shunda ukasi Sardorga qurilish bo‘layotgan joyga olib borib kelishim mumkinligini aytganimda u aytilgan manzilga Matiz’da keldi.
Uning avtomashinasiga chiqib, yo‘lda ketayotganimizda o‘zaro janjallashib, tortishib ketdik. U bo‘g‘ishni boshlaganida men ham unga javoban bo‘ynidan bo‘g‘dim. Shunda haydovchi mashinani chetga olib to‘xtatdi. Yonimizda o‘tirgan Bahodir esa bizni ajratish maqsadida o‘rtaga tushganida Sardor unga aralashmasligini aytib, qo‘lidagi pichoq bilan qorniga bir marotaba sanchib oldi. Bahodir o‘zini himoya qilish uchun yerdan g‘isht bo‘lagini olib, unga otdi, lekin tegmadi. Oqayotgan qonni ko‘rib, Sardor u yerdan qochib ketdi.
Haydovchi ikkalamiz Bahodirni avtomashinaga chiqarib, viloyat shoshilinch yordam kasalxonasiga olib bordik. Bor gap shu”, — deydi guvoh Avazbek.
Mazkur ishni ko‘rib chiqqan sudya Kamoliddin Shahobiddinov ayblanuvchi S.U.ni Jinoyat kodeksining 104-moddasi 3-qismi “b” (qasddan badanga og‘ir shikast yetkazib odam o‘ldirish) bandida nazarda tutilgan jinoyatni sodir etganlikda aybli deb topib, unga nisbatan besh yil muddatga ozodlikdan mahrum qilish jazosi tayinlagan.