Buchada tinch aholining o‘ldirilishi haqidagi ma’lumotlar “jiddiy shubha ostiga olinishi kerak”. Bu haqda Rossiya prezidentining matbuot kotibi Dmitriy Peskov gapirib o‘tdi.
Ko‘rib turganimizdek, videomateriallarga ko‘p jihatdan ishonib bo‘lmaydi, chunki Mudofaa vazirligidagi mutaxassislarimiz tomonidan aniqlangan videomontaj hamda u yoki bu turdagi soxtalik belgilari bor. Faktologiya, voqealarning kalendar ketma-ketligi ham ushbu bayonotlarning ishonchliligi foydasiga gapirmaydi. Biz har qanday ayblovlarni qat’iyan rad etamiz, — dedi Peskov.Peskov Rossiya Buchadagi qotilliklar mavzusini “eng yuqori darajada” muhokama qilishni so‘rayotgani, shuning uchun BMT Xavfsizlik kengashining yig‘ilishini o‘tkazishni talab qilganini ta’kidladi.
Prezident matbuot kotibi voqea joyiga tashrif buyurgan G‘arb ommaviy axborot vositalarining xalqaro muxbirlari tomonidan suratga olingan videolar soxtami yoki yo‘qmi degan savolga to‘g‘ridan to‘g‘ri javob berishdan qochdi va Kreml faqat “asosiy ayblovlarga asos bo‘lgan kadrlar” haqida gapirayotganini ta’kidladi.
Eslatib o‘tamiz, Kiyev viloyatidan Rossiya qo‘shinlari chiqib ketgandan so‘ng ko‘chalarda o‘nlab tinch aholining jasadlari qolgan – ularning ba’zilari qo‘llari bog‘langan holda topilgan. Human Rights Watch huquq himoyachilarining aytishicha, Bucha shahrida kamida bitta sudsiz qatl holati qayd etilgan.
Ukraina bosh prokurori Irina Venediktovaning ma’lum qilishicha, Rossiya harbiylaridan ozod qilingan Kiyev viloyati hududlarida 410 nafar tinch aholining jasadlari yig‘ib olingan. Ular sud-tibbiyot ekspertizasiga yuborilgan.
Rossiya Mudofaa vazirligi Rossiya harbiylari tomonidan Buchada tinch aholining o‘ldirilgani haqidagi xabarlarni “provokatsiya” va “sahnalashtirish” deb atadi. Kreml “Ukraina radikallarining Buchadagi dahshatli provokatsiyasi munosabati bilan” 4-aprel kuni BMT Xavfsizlik kengashi yig‘ilishini o‘tkazishni so‘radi.
BMT Xavfsizlik kengashi Rossiyaning ushbu so‘rovini rad etdi. Rossiyaning so‘rovi Xavfsizlik kengashiga raislik qiluvchi Buyuk Britaniya tomonidan rad etilgan.
Reuters agentligi Britaniya delegatsiyasiga tayanib, 5-aprel kuni Ukrainadagi vaziyatni muhokama qilish yuzasidan yig‘ilish o‘tkazilishini xabar qildi.
Avvalroq Fransiya prezidenti Emmanuel Makron Rossiya hukumati Buchadagi jinoyat uchun javob berishi kerakligini aytgani, Germaniya kansleri Olaf Shols esa Rossiyaga yangi sanksiyalar e’lon qilishi haqida xabar berilgandi.
Mavzuga doir: Bucha fojiasi. 3-aprelning asosiy voqealari
Izoh (0)