Toshkent aholisi gaz bosimining pastligidan shikoyat qilmoqda. “O‘ztransgaz” hech qanday cheklovlar o‘rnatilmaganini ma’lum qildi

Ijtimoiy tarmoqlarda Toshkent shahri aholisi xonadonlarga tabiiy gaz bosimi pasayib ketganidan shikoyat qilayotgan xabarlar tarqaldi. “O‘ztransgaz” holatga munosabat bildirib, hech qanday cheklovlar o‘rnatilmaganini ma’lum qildi.

“O‘ztransgaz” AJ tabiiy gazni qazib oluvchi tashkilotlardan olib, magistral gaz quvuriga ulangan iste’molchilarga yetkazib beruvchi operator sanaladi. Ma’lum qilinishicha, bayram kunlarida aholi va ijtimoiy soha obyektlarini tabiiy gaz bilan kafolatli ta’minlash maqsadida qo‘shimcha chora-tadbirlar yo‘lga qo‘yilgan.

“Shu kunlarda ‘O‘ztransgaz’ AJ tizimidagi barcha kompressor stansiyalarining agregatlari va gaz taqsimlash stansiyalari bir maromda ish olib borishi uchun mavjud imkoniyatlardan samarali foydalanilyapti. Tun-u kun navbatchilik yo‘lga qo‘yilgan tizim korxonalari tomonidan strategik ahamiyatga ega korxonalar, aholi va ijtimoiy soha obyektlariga tabiiy gaz uchun hech qanday cheklov o‘rnatilmagan, tabiiy gaz belgilangan limit doirasida bir maromda yetkazib berilmoqda”, — deyiladi munosabatda.

“O‘ztransgaz”, shuningdek, ayni paytda jamiyat tomonidan tabiiy gaz shartnomalarda ko‘zda tutilgan hajmlar doirasida hech bir cheklovlarsiz yetkazib berilayotganini ma’lum qilgan.

Eslatib o‘tamiz, Farg‘ona vodiysi viloyatlaridagi barcha avtomobillarga gaz to‘ldirish kompressor stansiyalari 18-mart soat 18:00 dan 19-mart 06:00 gacha faoliyatini to‘xtatgan edi. Bu aholi xonadonlari, ijtimoiy soha va strategik ahamiyatga ega obyektlarni tabiiy gaz bilan barqaror ta’minlash maqsadida amalga oshirilgandi.