Samarqand viloyatining Jomboy tumanida YPX xodimlarining xizmat faoliyatiga qarshilik ko‘rsatib, ularni urgan shaxs qo‘lga olindi. Bu haqda viloyat IIB axborot xizmati xabar berdi.
Ma’lum qilinishicha, 5-mart kuni Samarqand viloyati IIB YHXB 1-otryadining uch nafar xodimi Jomboy tumanida xizmat olib borayotgan vaqtida Lacetti avtomobilini to‘xtatgan. Biroq mashina harakatni davom ettirgan va u tegishli tartibda to‘xtatilganida 44 yoshli haydovchi qochib ketishga uringan.
YPX xodimlari haydovchini ushlagan vaqtida u qarindoshlarini chaqirgan. Erkakning yaqinlari YPX xodimlarining xizmat vazifasini bajarishiga qarshilik ko‘rsatib, ularni ura boshlagan. Oqibatda inspektorlar turli darajadagi jarohatlarni olgan.
IIV Shaxsiy xavfsizlik bosh boshqarmasi Samarqand viloyati boshqarmasi xodimlarining sa’y-harakatlari tufayli xodimlarga qarshilik ko‘rsatgan shaxs aniqlangan. Holat yuzasidan Jomboy tumani prokuraturasi tomonidan jinoyat ishi qo‘zg‘atilib, tergov harakatlari olib borilmoqda.
Tumanning “Sarichashma” mahallasida yashovchi 34 yoshli fuqaro (haydovchining qarindoshi) gumonlanuvchi tariqasida ushlangan.
“YPX xodimlari tortishib yotganini eshitib, yugurib bordim va ularni urdim. Ikkala YPX xodimining qo‘liga bir martadan tepdim. Ular nima sababdan tortishayotganidan bexabar edim, bilmasdan, ularni (qarindoshlarini — tahr.) uryapti deb o‘ylagan ekanman”, — deydi ayblanuvchi. Ta’kidlanishicha, YPX xodimlaridan qochgan Lacetti haydovchisi o‘sha vaqtda mast holatda bo‘lgan.
Ushbu shaxs yetti kundan beri hibsda saqlanayotgani, to‘rt nafar farzandini sog‘inganini aytib, qilmishidan pushaymonligini bildirgan.
Avvalroq Samarqandda YPX xodimini haqorat qilgan haydovchi 10 sutkaga qamalgani, Qashqadaryoda YPX xodimlari bilan janjallashgan haydovchi 14 sutkaga qamalgani, Samarqandda haydovchining telefonini tortib olishga uringan YHXB xodimiga xizmat tekshiruvi tayinlangani to‘g‘risida xabar berilgandi.
Mavzuga doir:
Izoh (0)