Navro‘z bayrami tadbirlari doirasida Toshkent shahrida Ijtimoiy turizm assotsiatsiyasi hamda Turizm va madaniy meros vazirligi hamkorligida tashkil etilgan Nogironlar va nogironligi bo‘lgan shaxslarni qo‘llab-quvvatlash markazining ochilish marosimi bo‘lib o‘tdi. Bu haqda vazirlik matbuot xizmati xabar berdi.
Markazning asosiy maqsadi nogiron vatandoshlar va ehtiyojmand oilalar farzandlari uchun xayriya tadbirlarini o‘tkazishdan iborat.
Ochilish marosimida bosh vazir o‘rinbosari, turizm va madaniy meros vaziri Aziz Abduhakimov, Toshkent shahar hokimi Jahongir Ortiqxo‘jayev, Turizm va madaniy meros vazirligi, Ijtimoiy turizm assotsiatsiyalari hamda ommaviy axborot vositalari vakillari ishtirok etgan.
Nogironlar va nogironligi bo‘lgan shaxslarni qo‘llab-quvvatlash markazining asosiy vazifalari:
- inklyuziv turizmni rivojlantirish bo‘yicha qo‘shma loyihalarni amalga oshirish;
- nogironlarning harakatlanishi uchun sharoit yaratishga ko‘maklashish;
- ijtimoiy turizm sohasida davlat dasturlari, huquqiy hujjatlar va boshqa qarorlar loyihalarini ishlab chiqish va jamoatchilik nazoratini amalga oshirish;
- turistik obyektlarda imkoniyati cheklangan shaxslar uchun yaratilgan shart-sharoitlarni o‘rganish;
- Samarqand, Buxoro, Xiva, Qoraqalpog‘istonda qulay turistik yo‘nalishlarni rivojlantirish;
- vazirliklar va boshqa davlat tashkilotlari bilan hamkorlikda xayriya tadbirlarini tashkil etish.
Turizm va madaniy meros vazirligi Ijtimoiy turizm assotsiatsiyasi bilan hamkorlikda “Sayohat barcha uchun” loyihasi doirasida 50 nafar imkoniyati cheklangan fuqaro uchun Samarqand va Buxoro shaharlariga ikki kunlik turistik sayohatlar tashkil etgan. 2022-yil davomida mazkur loyiha doirasida 200 kishining Samarqand shahriga sayohatlarini tashkil etish rejalashtirilgan.
Turistlar uchun sarflanadigan xarajatlarning 50 foizi grant mablag‘lari, 50 foizi esa xayriya mablag‘lari hisobidan qoplanishi taxmin qilinmoqda.
Avvalroq Shavkat Mirziyoyev nogironligi bo‘lgan shaxslarni ijtimoiy qo‘llab-quvvatlash choralarini yanada kuchaytirishga qaratilgan farmonni imzolagani to‘g‘risida xabar berilgandi. Farmonga ko‘ra, endilikda nogiron bo‘lib qolishi muddatidan qat’i nazar, nogironligi bo‘lgan shaxslarga bir xil miqdorda — 622 ming so‘mga teng nafaqa tayinlab boriladi. Dastlabki hisob-kitoblarga ko‘ra, 49 ming nafar nogironligi bo‘lgan shaxslar uchun nafaqa 41 foizga oshadi. Mazkur chorani amalga oshirishga 2022-yilga qo‘shimcha 81 milliard so‘m ajratiladi.
Izoh (0)