AQSh rahbariyati yaqin kunlarda Sharqiy Yevropaga qo‘shimcha harbiy kuchlarni yuborish niyatida. Bu haqda mamlakat prezidenti Jo Bayden 28-yanvar kuni jurnalistlar bilan uchrashuvida ma’lum qildi, deb xabar beradi “TASS”.
“Men yaqin kelajakda AQSh qo‘shinlarini Sharqiy Yevropaga, NATO davlatlariga yuboraman. U qadar ko‘p emas”, — deydi Amerika yetakchisi. Ukrainadagi vaziyat bo‘yicha yangi ma’lumot bormi degan savolga Bayden “Oxirgi ikki soatda yo‘q”, deya javob qaytargan.
24-yanvar kuni Pentagon matbuot kotibi Jon Kirbi AQSh Yevropaga 8,5 ming harbiy xizmatchini yuborishga tayyorligini ma’lum qilgandi, biroq bu boradagi yakuniy qaror hozircha qabul qilinmagan. Uning so‘zlariga ko‘ra, gap jangovar, razvedka, aviatsiya, tibbiyot va transport bo‘linmalari haqida ketmoqda. 25-yanvar kuni esa Kirbi CNN telekanaliga bergan intervyusida Qo‘shma Shtatlar NATOga a’zo bo‘lmagan Yevropa davlatlari hududida o‘z qo‘shinlarini joylashtirish niyatida emasligini ta’kidlagan.
Eslatib o‘tamiz, Ukraina bilan chegarada Rossiya qo‘shinlarining to‘plangani haqidagi ma’lumotlar oktabr oyida g‘arb OAVlarida paydo bo‘lishni boshlagan. Noyabr oyi o‘rtalarida Ukraina prezidenti Vladimir Zelenskiy chegarada 100 ming Rossiya qo‘shini borligini ma’lum qilgan. AQSh Davlat kotibi o‘rinbosari Viktoriya Nuland Rossiyaning Ukrainaga “bostirib kirishi” 2022-yil boshida sodir bo‘lishi mumkinligini aytgan.
Moskva bu ma’lumotlarni rad etib, Ukrainadagi harbiy harakatlarga tayyorgarlik haqidagi xabarlarni “quruq, asossiz keskinlik” deb atamoqda. Qolaversa, Rossiya g‘arb davlatlaridan NATOning sharqqa tomon kengaymasligi, Ukraina esa bu tashkilotga qabul qilinmasligi haqida kafolat talab qilgan.
Mavzuga doir:
NATO bosh kotibi Yens Stoltenberg alyansga a’zo davlatlar o‘z qo‘shinlarini Ukrainaga joylashtirmasligini bildirgan.
Izoh (0)