Shavkat Mirziyoyev harbiy xizmatchilar va huquqni muhofaza qilish organlari xodimlariga orden va medallarni topshirdi

Shavkat Mirziyoyev boshchiligida 14-yanvar kuni Prezident administratsiyasida Qurolli Kuchlari tashkil etilganining 30 yilligi hamda Vatan himoyachilari kuni munosabati bilan harbiy xizmatchilar va huquqni muhofaza qilish organlarining bir guruh xodimlari harbiy unvonlar, orden va medallar bilan taqdirlandi. Bu haqda Prezident matbuot xizmati xabar qildi.

Qayd etilishicha, davlat rahbari barcha harbiy xizmatchilarni va soha faxriylarini mazkur shonli sana bilan tabriklagan:

“Mustaqilligimizning 30 yilida Qurolli Kuchlarimiz tashkil topib, fidoyi askarlar, ofitser va generallar yetishtirib, zarur aslahalar bilan ta’minlanib, bugun mana shunday yetuk armiyaga aylandi. Bu jonajon Vatanimizdagi tinchlik, barqarorlik, xalqimizning osoyishta yashashiga zamin bo‘lyapti”.

So‘nggi yillarda mudofaa tizimining jangovar salohiyatini oshirish bo‘yicha bir qator ishlar qilingan. Harbiy boshqaruv tizimi deyarli yangidan barpo etildi. Harbiy-ma’muriy sektorlar tuzilgan. Qo‘shin turlari o‘rtasida o‘zaro hamkorlikni ta’minlash bo‘yicha ta’sirchan mexanizmlar yo‘lga qo‘yilgan. Eng murakkab vazifalarni ham tezkorlik bilan bajarishga qodir bo‘lgan bo‘linmalar tashkil etilgan. Qo‘shinlarning jangovar va ruhiy tayyorgarlik darajasi oshgan.

Har yili Vatan himoyachilari kuni arafasida Xavfsizlik kengashi yig‘ilishi o‘tkazilib, sohada bajarilgan ishlar va navbatdagi muhim vazifalar muhokama qilib borilmoqda.

“Kechagi yig‘ilishda biz munosib kuch-qudratimizni bundan ham mustahkamlash, har bir yo‘nalishda ilmni rivojlantirish, kadrlar tayyorlash bo‘yicha katta rejalar qabul qildik. Dunyoda va mintaqamizda bo‘layotgan tahlikali voqealarni chuqur tahlil qilib, xalqimizning tinchligi, chegaralarimiz daxlsizligi bo‘yicha qo‘shimcha choralar ko‘ramiz. Biz faqat o‘z kuchimizga ishonamiz”, — prezident.

Vatan himoyachilari bilim va fazilatlari bilan yoshlarga namuna bo‘lishi kerakligi ta’kidlangan.

“Harbiy okruglarga, harbiy-ma’muriy sektorlarga men qo‘ygan eng katta vazifa – xalq bilan armiya birligini ta’minlash, inson qadrini ulug‘lash haqida bo‘ldi. Bunda sizlar yetakchi, har bir harakatingiz bilan yoshlarga namuna bo‘lasiz, deb ishonaman”, — degan davlat rahbari.

Marosimda Shavkat Mirziyoyev unvon to‘g‘risidagi guvohnomalarni, orden va medallarni tantanali ravishda topshirdi. Vatan himoyachilariga sihat-salomatlik, zimmasidagi olijanob vazifalarni samarali ado etishda ulkan zafarlar tilagan.

“Afsuski, hamma mukofotlanganlarni bu zalga yig‘ishning iloji yo‘q. Lekin barcha mukofotlanganlarni, bugun kelolmaganlarni ham davlatimizning yuksak unvonlari, orden va medallari bilan chin dildan tabriklayman. Mukofot bu – e’tibor, xalqimizning ishonchi timsoli. Bu sizlarga ruh, kuch-g‘ayrat bag‘ishlab, yangi-yangi muvaffaqiyatlarga undashi kerak. Mard posbonlari bor xalqning ertangi kunga ishonchi mustahkam, g‘urur-iftixori baland bo‘ladi”, — degan prezident.

So‘zga chiqqanlar yuksak mukofot va doimiy e’tibor uchun davlat rahbariga minnatdorlik bildirgan.

Eslatib o‘tamiz, Shavkat Mirziyoyev Qurolli Kuchlar tashkil etilganining 30 yilligi munosabati bilan tabrik yo‘llab, bir guruh harbiylarni mukofotlagandi.