Andijon davlat universiteti binosi to‘rtinchi qavatidan ota-onalar majlisiga kelgan ayol tushib ketgani haqida xabar berilgandi. Bosh prokuror matbuot kotibining ma’lum qilishicha, mazkur holat yuzasidan jinoyat ishi qo‘zg‘atilgan.

Foto: Andijon davlat universiteti matbuot xizmati

Qayd etilishicha, 4-dekabr kuni 28 yoshli ayol ADU 2-bosqich talabasining oila a’zosi sifatida Tarix fakulteti binosida bo‘lib o‘tadigan ota-onalar majlisiga kelgan. U binoning 4-qavatida telefondan foydalanib, ehtiyotsizligi oqibatida zinalarda to‘siq yo‘qligi sabab pastga yiqilgan va og‘ir tan jarohati olgan.

Olib borilgan tekshirish harakatlari davomida ushbu binoda ta’mirlash ishlarini olib borayotgan “S.Haus” MChJ ishchilari tomonidan zinapoyalarning to‘siqlari olib tashlanib, qurilish ishlari amalga oshirilayotgani aniqlangan. Holat yuzasidan MChJ mansabdor shaxslariga nisbatan Jinoyat kodeksining 257-moddasi (mehnatni muhofaza qilish qoidalarini buzish) bilan jinoyat ishi qo‘zg‘atilgan.

“Hozirda Andijon shahar Tergov bo‘limi tomonidan tergov harakatlari olib borilmoqda”, — deyiladi xabarda.

Avvalroq Qashqadaryoda texnikum talabasi yotoqxonaning 5-qavatidan o‘zini tashlab, vafot etgandi. Keyinchalikvafot etgan qizning so‘nggi lahzalari kuzatuv kamerasiga tushib qolgani xabar qilindi.