2021-yil 18-noyabr kuni Moskva shahrida O‘zbekiston tashqi ishlar vaziri Abdulaziz Komilov Rossiya tashqi ishlar vaziri Sergey Lavrov bilan uchrashdi. Bu haqda O‘zbekiston TIV matbuot xizmati xabar berdi.
Ma’lum qilinishicha, tashqi siyosat mahkamalar rahbarlari oliy darajadagi Rossiyaga kutilayotgan tashrifga tomonlarning tayyorligi yuqori darajada ekanini mamnuniyat bilan qayd etgan hamda davlatlararo munosabatlarning dolzarb masalalarini muhokama qilgan.
Ikki mamlakatning xalqaro va mintaqaviy tashkilotlar doirasida yaqin aloqalarni davom ettirish va o‘zaro qo‘llab-quvvatlashga tayyorligi bildirilgan. Afg‘onistondagi vaziyat yuzasidan fikr almashilgan.
“2022-yil O‘zbekiston va Rossiya o‘rtasida diplomatik munosabatlar o‘rnatilganining 30 yilligi nishonlanadi. Biz hamkorlikda ushbu muhim sanani nishonlash uchun yirik ijtimoiy va madaniy tadbirlar o‘tkazish bo‘yicha maxsus dastur ishlab chiqdik”, — deydi Abdulaziz Komilov.
Uchrashuv yakunida vazirlar axborot va biologik xavfsizlik sohasida qator ikki tomonlama hujjatlar, shuningdek, O‘zbekiston Tashqi ishlar vazirligi va Rossiya Tashqi ishlar vazirligi o‘rtasida 2022—2023-yillarga mo‘ljallangan hamkorlik dasturini imzolagan.
Avvalroq O‘zbekiston prezidenti Shavkat Mirziyoyev Rossiya prezidenti Vladimir Putinning taklifiga binoan tashrif bilan Rossiyaga jo‘nab ketgani to‘g‘risida xabar berilgandi. Uchrashuvda ikki mamlakat o‘rtasidagi strategik sheriklik va ittifoqchilik munosabatlarini yanada mustahkamlash masalalari muhokama qilinishi, qator hujjatlar imzolanishi rejalashtirilgan.
Izoh (0)