Pfizer farmatsevtika korporatsiyasi Paxlovid tovar belgisini ro‘yxatdan o‘tkazish bo‘yicha ariza berdi. Bu haqda Intellektual mulk agentligining “Intellektual mulk” tizimi ma’lumotlariga tayanib, Spot xabar berdi.
Ma’lum qilinishicha, ariza 11-noyabr kuni berilgan. Kompaniyaning faoliyat turi sifatida farmatsevtika mahsulotlari va tibbiy dori vositalari ko‘rsatilgan.
Paxlovid — Pfizer tomonidan koronavirusni davolashda yaratilgan yangi dori vositasi hisoblanadi. O‘tgan hafta farmatsevtika kompaniyasi mazkur dori vositasi sinovining ikkinchi fazasi yakunlangani va uni ro‘yxatdan o‘tkazish bo‘yicha hujjatlarni tayyorlash boshlanganini e’lon qilgandi.
Pfizer ma’lumotlariga ko‘ra, dori vositasining xavf darajasi yuqori bo‘lgan bemorlardagi samaradorligi 89 foizni tashkil etgan.
Paxlovid tadqiqotlarida xavf ostida bo‘lganlar guruhiga kiruvchi 1,2 ming kishi ishtirok etgan. Kasallikning dastlabki kunlarida dori vositasini qabul qilganlar orasida 1 foizdan kamrog‘i kasalxonaga yotqizilgan — platsebo guruhida esa ushbu ko‘rsatkich 7 foiz. Bundan tashqari, platsebo guruhidagi bemorlarning 1,6 foizi vafot etgan, Paxlovid olganlar orasida vafot etganlar yo‘q.
Eslatib o‘tamiz, 2021-yilning 28-sentabridan O‘zbekiston bosh davlat sanitariya vrachi va milliy texnik immunologik ekspert komissiyasining qaroriga asosan, mamlakatda ota-onalar va vasiylarining roziligi asosida, ixtiyoriy ravishda 12 yoshdan katta bolalarni Pfizer vaksinasi bilan emlash yo‘lga qo‘yilgan.
Izoh (0)