Yaponiyaning Lexus kompaniyasi va AQShning musiqiy uskunalar ishlab chiqarish bilan shug‘ullanuvchi mashhur Fender korxonasi Fender Lexus LC Stratocaster nomli gitarani taqdim etdi. U Fender Custom Shop atelyesining bosh mutaxassisi Ron Torn tomonidan yasalgan bo‘lib, loyihani yaratishda Lexus LC avtomobilidan ilhomlanilgan. Gitaraning o‘ziga xosligi u Lexus tomonidan 15 yil davomida yaratilgan Structural Blue ko‘k rangiga bo‘yalganida, deb xabar beradi Motor.

Foto: Lexus

Stratocaster modelidagi gitaraning korpusi Structural Blue nomini olgan ko‘k rangi jilosiga bo‘yalgan. Bo‘yoqni yaratish ustida Lexus’ning AQSh va Yaponiyadagi texnik markazlari, shuningdek, VIAVI Solution kompaniyasi ish olib borgan. Uni tayyorlashda 40 ta alohida qatlamli pigmentdan foydalanilgan, rang yoritilish darajasiga qarab muntazam o‘zgarib turadi — bu murakkab nanostruktura bilan izohlanmoqda. Grif xromlangan Fender logotipi bilan bezatilgan, grifning ustki qismi esa silliqlangan to‘q ko‘k Richlite kompozit materialidan ishlangan.

Korpus qoplamasi silliqlangan uglerod toladan yasalgan, tutqichlari — Lexus’da foydalanilgan mark Levinson audiotizmlaridagi kabi xira alyuminiydan. Fender Lexus LC Stratocaster tiraji cheklangan bo‘lib, butun dunyo bo‘ylab 100 nusxada yaratiladi — gitaralarning barchasi uglerod tolali vinil bilan bezatilgan va qora charm bilan qoplangan, ichiga Lexus logotipi tushirilgan individual g‘ilofda yetkazib beriladi. Gitara narxi 6 ming dollarni tashkil etadi. Structural Blue bo‘yog‘i bilan kuniga faqat ikkita avtomobil bo‘yaladi.

Avvalroq Elvis Preslining noyob gitarasi yarim million dollarga sotilgani to‘g‘risida xabar berilgandi.