Toshkent viloyatining Bo‘stonliq tumanida avariyaga uchragan avtomobil haydovchisining hayotini xavfsizlik kamari qutqarib qoldi. Bu haqda FVV matbuot xizmatiga tayanib, “Podrobno” xabar berdi.

Foto: FVV matbuot xizmati

“1-oktabr kuni Spark avtomobili Chimyon tomon harakatlanayotgan bo‘lgan. Toshkent—Chimyon avtomobil yo‘lining Bo‘stonliq tumani hududiga kiruvchi 76-kilometrida haydovchi boshqaruvni yo‘qotishi oqibatida mashina yo‘ldan 150 metr pastga tushib ketgan”, — deyiladi xabarda.

Haydovchi ayol xavfsizlik kamarini taqqani sabab omon qolgani aytilmoqda. Unga hech qanday shikast yetmagan, faqat biroz qo‘rquv bilan qutulgan.

Yo‘l-transport hodisasi joyiga Toshkent viloyati FVBning qutqaruv otryadi yetib kelgan. Qutqaruvchilar haydovchiga psixologik yordam ko‘rsatgan, avtomobil esa bir necha daqiqa ichida maxsus texnikalar yordamida chiqarib olingan.

Avvalroq Bo‘stonliqda FVV dam olishga borgan bir guruh fuqarolarni mashinada jarlikka tushib ketishidan qutqarib qolgandi.