Avstraliyada 35 kilogacha semirib ketgan vombat diyetaga o‘tkazilib, sport bilan shug‘ullantirilmoqda

Avstraliyaning Kvinslend shtatida Miss Rubi laqabli vombat (Avstraliyadagi xaltalilar oilasiga mansub, sut emizuvchi hayvon) vazni ortib ketgani sabab diyetaga o‘tkazildi, deb xabar beradi Esquire.

Odatda vombatlarning og‘irligi 20—32 kilogramm atrofida bo‘ladi, biroq Miss Rubining vazni 35 kilogrammga yetgan. Safe Haven qo‘riqxonasi o‘zining Facebook’dagi sahifasiga xaltalining suratini joylashtirgan bo‘lib, hayvon ijtimoiy tarmoq foydalanuvchilarini hayratga solgan.

Ammo Miss Rubining bu kabi ko‘rinishi uning sog‘lig‘i uchun zarar, shu sababli qo‘riqxona xodimlari uning uchun maxsus oziqlanish tizimini ishlab chiqqan. Bundan tashqari, unga ortiqcha vazndan xalos bo‘lish uchun intensiv sayrlar tayinlangan.

Miss Rubi OAV va ijtimoiy tarmoqlar e’tiborini birinchi bor o‘ziga tortishi emas. 2016-yilda u inson qo‘lida xuddi bolakay kabi yotishni yaxshi ko‘rishi sabab internet yulduziga aylangandi.

Avvalroq Angliyada Oskar laqabli it besh yilda 9 kiloga ozib, pandemiya sabab yana semirib ketgani to‘g‘risida xabar berilgandi.