Navoiyda sodir bo‘lgan yo‘l-transport hodisasi oqibatida ikki kishi halok bo‘ldi, deb xabar beradi IIV YHXBB axborot xizmati.
Ma’lum qilinishicha, viloyatning Nurota tumani markaziga harakatlanayotgan Nexia avtomobil yo‘ldan chiqib ketib, yo‘l-transport hodisasini sodir etgan. YTH oqibatida mashina ichida bo‘lgan ikki nafar fuqaro voqea joyida vafot etgan.
“Avariya sodir etilgan joydagi yo‘l qoplamasida kamchiliklar mavjud emas, yo‘l chiziqlari va yo‘l belgilari to‘liq o‘rnatilgan. 2021-yil bahorda o‘tkazilgan ko‘rik natijalariga ko‘ra, tegishli mutasaddi va tashkilotlarga kamchiliklar yuzasidan taqdimnomalar berilgan”, — deydi Nurota tuman IIB YHXG katta inspektori Murodillo Jo‘rayev.
Holat yuzasidan Nurota tuman IIB Tergov bo‘limi tomonidan Jinoyat kodeksining 266-modda (transport vositalari harakati yoki ulardan foydalanish xavfsizligi qoidalarini buzish) 3-qismi “a” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq Jizzaxda Cobalt va “ZIL” to‘qnashuvi oqibatida yo‘lovchi halok bo‘lgani, Namanganda Damas va Nexia to‘qnashuvi oqibatida haydovchilardan biri vafot etgani, Toshkentda Nexia bilan to‘qnashgan Matiz ag‘darilib ketgani to‘g‘risida xabar berilgandi. Mavzuga doir:
