Bugun,

  • USD 11014.01
  • RUB 191.8
  • EUR 10674.78

O‘zbekistondagi bog‘chalarda ayrim hollarda “klan”lar mavjud bo‘lib, bog‘chalarni meros qilib qoldirish holatlari kuzatilgan. Bu haqda maktabgacha ta’lim vaziri Agrippina Shin Xalqaro press-klubning 4-avgust, chorshanba kuni bo‘lib o‘tgan navbatdagi sessiyasida so‘z yuritdi.

“Daryo” muxbiri Mirolim Isajonovning “Maktabgacha ta’lim tizimida nepotizm, ya’ni qarindosh-urug‘chilikka qarshi qanday ishlar olib borilyapti?”, degan savoliga Agrippina Shin shunday javob qaytardi:

Foto: Maktabgacha ta’lim vazirligi axborot xizmati

Foto: Maktabgacha ta’lim vazirligi axborot xizmati

“Shu va shunga o‘xshash qonun buzilishlariga qarshi kurashish uchun maktabgacha ta’lim tizimida ichki audit xizmati yaratilgan. Shuningdek, ikki oy oldin vazirlikda alohida korrupsiyaga qarshi kurashish kompleks nazorat bo‘limi tashkil etildi. Bundan tashqari, Korrupsiyaga qarshi kurashish agentligi bilan ham o‘zaro hamkorlik bo‘yicha memorandum tuzilgan.

Haqiqatan, audit xizmati tomonidan uch yil ichida juda ko‘plab qonunbuzarliklar aniqlandi. “O‘lik jon”larni yozish holatlari bor, buni inkor etmaymiz. Aynan shu yo‘nalish bo‘yicha O‘zbekiston Prezidentining 5144-son qaroriga asosan, boshqaruv kadrlarni tanlash uchun shaffof platformani ko‘rib chiqish va yaratish borasida ishlar olib boryapmiz. Rostdan ham bolalar bog‘chalarida ba’zi hollarda “klan”lar mavjud bo‘lgan, bog‘chalarni meros qilib qoldirishgan. Biz bu muammolarni ham qayta ko‘rib chiqyapmiz”, — dedi Shin.

Uning qayd etishicha, ta’lim tashkilotlarida qarindoshlar bir-biridan moliyaviy mustaqil bo‘lgan holatda ishlashi mumkin.

“Xabaringiz bor, hozir barcha viloyat maktabgacha ta’lim boshqarmalari va tuman, shahar bo‘limlari rahbarlari lavozimi ijro majburiyatlari lavozimigacha tushirilgan. Rahbarlik lavozimlariga tanlov ularning faoliyati natijalariga qarab, “argos” shaffof raqamli platformasi orqali amalga oshiriladi.

Shuningdek, maktabgacha ta’lim tashkilotlari rahbarlarini qayta ko‘rib chiqish bo‘yicha kompleks tadbirlar o‘tkazishni rejalashtirganmiz. Ammo mehnat qonunchiligiga kiritilgan o‘zgartirishlarga ko‘ra, ta’lim tashkilotlarida qarindoshlar bir-biridan moliyaviy mustaqil bo‘lgan holatda ishlashi mumkin. Ya’ni deylik, qizi tarbiyachi bo‘lib ishlaydi, ona esa mudira, ya’ni faqat pedagogik yo‘nalishda. Lekin ona mudira, qizi esa xo‘jalik yurituvchi yoki moliyaviy lavozimda ishlashi umuman mumkin emas”, — dedi maktabgacha ta’lim vaziri.

Izoh
Asosiy yangiliklar
Mahalliy
O‘zbekistonda sentabr oyida eng qimmat va eng arzon palov qayerda tayyorlangani ma’lum qilindi
Sport
Futzal bo‘yicha Osiyo Kubogi. O‘zbekiston 7 ta gol urilgan o‘yinda Bahraynni tor-mor etdi
Dunyo
Alla Pugachyova qasrini 1 milliard rublga sotuvga qo‘ydi