Qashqadaryoning Nishon tumani “Kaptarli” mahallasida yashovchi 51 yoshli fuqaro 25-iyul oqshomida uyidan IIB xodimlari tomonidan sog‘lom holda olib ketilib, 26-iyul kuni peshindan so‘ng shifoxona orqali o‘lik holda qaytarilgani to‘g‘risida xabar berilgandi. Bosh prokuratura matbuot kotibi Hayot Shamsutdinovning ma’lum qilishicha, holat yuzasidan Qarshi tuman prokuraturasi tomonidan tergovga qadar tekshirish harakatlari olib borilmoqda.
Aniqlanishicha, 25-iyul kuni Nishon tumani IIB HPB profilaktika inspektorlari tomonidan chaqiruvga asosan yashash uyidan mast holda olib ketilgan va viloyat narkologiya dispanseriga yotqizilgan Nursoat Muhammadiyev 26-iyul kuni vafot etgan.
Mazkur holat yuzasidan Qarshi tuman prokuraturasi tomonidan tergovga qadar tekshirish harakatlari olib borilmoqda.
Marhumning o‘lim sabablarini aniqlash maqsadida sud-tibbiy ekspertizasi tayinlangan.
Bundan tashqari, Nursoat Muhammadiyevning viloyat dispanserida vafot etgani hodisasi bo‘yicha viloyat Sog‘liqni saqlash va Ichki ishlar boshqarmalariga xizmat tekshiruvi tayinlangan.
Avvalroq 2021-yilning may oyida Qoraqalpog‘istonning Taxiatosh tumanida IIBga olib ketilgan fuqaro vafot etgani, iyul oyi boshida esa Surxondaryo viloyatining Denov tumanida IIBga olib ketilgan fuqaroning shifoxonada joni uzilgani haqida xabar berilgan edi.
Izoh (0)