O‘zbekiston aviakompaniyalar faoliyatida monopoliya yaratmoqchi emas. Bu haqda 31-iyul kuni Uzbekistan Helicopters korxonasida bo‘lib o‘tgan H-125 vertolyotining taqdimot marosimida transport vaziri Ilhom Mahkamov aytib o‘tdi, deya xabar bermoqda “Daryo” muxbiri Musulmonbek Ibrohimov.

Airbus H-125 vertolyoti

Foto: “Daryo”/ Madina Nurman

Tadbirda Uzbekistan Helicopters korxonasi tomonidan tijoriy maqsadlarda foydalanish uchun mo‘ljallangan ikkita Airbus H-125 vertolyotining imkoniyatlari haqida ma’lumot berildi.

Ilhom Mahkamovning alohida ta’kidlashicha, Uzbekistan Helicopters yoki boshqa kompaniyalar uchun monopoliya yaratmoqchi emas.

Ilhom Mahkamov

Foto: “Daryo”/ Madina Nurman

“Transport vazirligi bu sohadagi har qanday kompaniyalarni qo‘llab-quvvatlaydi. Uzbekistan Helicopters bilan hamkorlik qilishni istagan har qanday turistik kompaniyalar uchun eshiklar ochiq. Shuni qayd etish joizki, Uzbekistan Airways bir vaqtlar yopiq bo‘lgan edi, endi biz ochiqlikka qarab ketyapmiz. Endi Uzbekistan Airways va Uzbekistan Helicopters faqat yo‘lovchilarga xizmat ko‘rsatish uchun ishlaydi, yo‘lovchilar avvalgidek bu kompaniyalar ortidan yurmaydi”, – dedi transport vaziri.

Marosimda ishtirok etgan bosh vazir o‘rinbosari Aziz Abduhakimovning aytishicha, Uzbekistan Helicopters davlat tomonidan ta’sis etilgan bo‘lsa-da, u monopoliya bo‘lmaydi va sohaga kirmoqchi bo‘lgan kompaniyalar uchun eshiklar doimo ochiq.

Aziz Abduhakimov

Foto: “Daryo”/ Madina Nurman

“Bu bozor ochiq, Uzbekistan Helicopters davlat tashkiloti bo‘lgani bilan, “bo‘ldi, manopoliya tashkil etilmoqda”, deyish kerak emas. Ya’ni bu vertolyot bozori ochiq va biz xususiy tadbirkorlarni, investorlarni ushbu bozorga taklif etamiz. Agar investitsiyalar amalga oshirilib, O‘zbekistonda yana Uzbekistan Helicopters kabi vertolyot kompaniyalar tashkil etiladigan bo‘lsa, bu, albatta, raqobat va kelajakda narxlarga ham ijobiy ta’sir qiladi. Agar shunday takliflar bo‘lsa, biz ularni tezda ko‘rib chiqib, kerakli litsenziya va boshqa sharoitlarni yaratib berishga tayyormiz”, – dedi bosh vazir o‘rinbosari.

Ta’kidlanishicha, “O‘zbekiston havo yo‘llari” kompaniyasidan tashqari boshqa yangi milliy aviakompaniyalar va vertolyot xizmatlari yo‘lga qo‘yilmoqda.

“Aviaxizmatlar bozori rivojlanyapti. Bu bozorda yangi ishtirokchilar va investorlarni kutib qolamiz. Turizm va sport vazirligi va Transport vazirligi birlashib, yana bir bor qaytaraman, bu kabi tashabbuslarni to‘liq qo‘llab-quvvatlashga tayyormiz”, – deya qo‘shimcha qildi Aziz Abduhakimov.

Ma’lumot uchun, O‘zbekistonning Qanot Sharq Airlines xususiy aviakompaniyasi ikkita Airbus A320-214 aviaoperatorini ro‘yxatdan o‘tkazgan edi. Ushbu samolyotlarning  birinchisi aprel oyida va ikkinchisi esa may oyida Toshkent shahriga olib kelingan. Shuningdek, 2021-yilning sentabr oyida ishga tushirish mo‘ljallangan yangi Samarqand xalqaro aeroporti boshqaruvini Air Marakanda kompaniyasiga berish rejalashtirilgan.

Avvalroq O‘zbekistonga oltinchi Dreamliner samolyoti keltirilgani haqida xabar berilgan edi. Uzbekistan Airways 2016-yilda Dreamliner’larning tijoriy ekspluatatsiyasini boshlagan va Boeing 787 ning Markaziy Osiyodagi birinchi buyurtmachisiga aylangan. Ilk ikki samolyot 2016-yilda, uchinchisi 2018- yilda va yana ikkitasi 2019-yilda olib kelingan.