Bahodir Jalolovning ishonchli g‘alabasi, hakamlar tomonidan “mag‘lub etilgan” navbatdagi bokschi. O‘zbekistonlik sportchilarning Tokio—2020 6-kunidagi natijalari

Yaponiyaning Tokio shahri mezbonlik qilayotgan Olimpiya o‘yinlarida o‘zbekistonlik sportchilar 29-iyul kungi chiqishlarini yakunladi.

Akademik eshkak eshish

Shahboz Xolmirzayev va Sobir Safaraliyev juftligi 13—18-o‘rinlarni aniqlab bergan musobaqada qatnashdi. Unda o‘zbekistonlik sportchilar 16-pog‘onani band etdi. Avvalroq sportchilar saralash bahslari, keyinchalik o‘tish musobaqasida to‘rtinchi o‘rinni egallab, final bosqichidan quruq qolgandi.

Dzyudo

-100 kg vazn toifasida harakat qiladigan Muhammadkarim Xurramov dastlabki bosqichda irlandiyalik Benjamin Fletcherni vazari bahosi bilan yengdi. 1/8 finalda Xurramov yaponiyalik Aron Volfga qarshi tatamiga chiqdi va tajribali raqibiga imkoniyatni boy berib qo‘ydi. Shu tariqa Xurramov yakkalik bahslaridagi ishtirokini yakunladi.

Shu tariqa o‘n kishidan iborat dzyudochilardan to‘qqiz nafari musobaqadagi ishtirokini o‘tkazishga ulgurdi. Natija — 1 ta bronza. 30-iyul kuni Bekmurod Oltiboyev (+100 kg) yakkalik bahslariga yakun yasab beradi.

Boks

29-iyul kuni uch nafar o‘zbekistonlik bokschi ringga ko‘tarildi. Avvaliga terma jamoa yetakchisi Bahodir Jalolov (+91 kg) o‘z ishtirokini boshladi. 1/8 finalda Jalolovga Ozarbayjon vakili Muhammad Abdullayev duch keldi. Bahodir raqibi ustidan ishonchli g‘alabani qo‘lga kiritib, keyingi bosqichga yo‘l oldi. Chorak finalda uni hindistonlik Satish Kumarga qarshi jang kutib turibdi. Eslatib o‘tamiz, Jalolov Tokio—2020 Olimpiadasiga litsenziya o‘ynalgan 2020-yilgi musobaqada Satishga qarshi jang qilgan va uni ishonchli tarzda mag‘lub etgandi.

Ayollar boksida -51 kg vazn toifasida ishtirok etgan Tursunoy Rahimova 1/8 finalda ushbu divizionning birinchi raqamli vakili — turkiyalik Naz Chaqiro‘g‘luga qarshi jang qildi. Birinchi raundda to‘liq ustunlik qilgan Rahimova qolgan raundlarda raqibi bilan teng (3-raundda faolroq) harakat qildi. Biroq yakunda hakamlarning tushunarsiz qarori (2:3) Rahimovani chorak final yo‘llanmasidan quruq qoldirdi.

Avvalroq Mirazizbek Mirzaxalilov hakamlarning tushunarsiz qarori tufayli Olimpiadani erta tark etgandi.

Ushbu kunning so‘nggi jangi -75 kg vaznlik Fanat Qahramonov ishtirokida bo‘ldi. Qahramonovga qozog‘istonlik kuchli bokschi Abilxan Amankul to‘qnash keldi. Dastlabki raundni o‘z foydasiga hal qilgan Fanat keyingi raundlarni boy berdi va Olimpiya o‘yinlari bilan xayrlashdi.

Shu tariqa Olimpiadani tark etgan o‘zbekistonlik bokschilar soni olti nafarga yetdi. Shahobiddin Zoirov, Elnur Abduraimov va Rayhona Qodirova 1/8 final bahsida ishtirok etsa, Bobousmon Boturov va Bahodir Jalolov chorak final yo‘llanmasiga ega chiqqan.