O‘zbekistonda 25-iyul kuni 705 kishida koronavirus infeksiyasi qayd etildi. O‘zbekiston Sog‘liqni saqlash vazirligi axborotiga ko‘ra, mamlakatda pandemiya boshidan beri koronavirusga chalingani rasman tasdiqlangan shaxslar soni 124 995 nafarga yetgan.

Yangi kasallanish holatlarining:

  • 71 tasi Qoraqalpog‘iston Respublikasida,
  • 21 tasi Andijon viloyatida,
  • 18 tasi Buxoro viloyatida,
  • 73 tasi Jizzax viloyatida,
  • 43 tasi Qashqadaryo viloyatida,
  • 13 tasi Navoiy viloyatida,
  • 35 tasi Namangan viloyatida,
  • 69 tasi Samarqand viloyatida,
  • 26 tasi Sirdaryo viloyatida,
  • 59 tasi Surxondaryo viloyatida,
  • 64 tasi Farg‘ona viloyatida,
  • 37 tasi Xorazm viloyatida,
  • 80 tasi Toshkent viloyatida,
  • 96 tasi Toshkent shahrida

koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan.

Qayd etish joiz, Qashqadaryo viloyatida 25-iyul kuni koronavirusga chalinganlar soni bo‘yicha 2021-yil antirekordi qayd etildi — bungacha viloyatda bir kunlik kasallanish bo‘yicha eng yuqori ko‘rsatkich 9-iyun kuni kuzatilgan, o‘shanda 27 kishida kasallik aniqlangan edi. Ayni vaqtda, Toshkent shahrida so‘nggi 12 kundagi eng past natija qayd etildi — bungacha iyul oyidagi eng past ko‘rsatkich 13-iyul kuni qayd etilgan, o‘shanda 93 kishida kasallik aniqlangan edi, shundan beri poytaxtdagi kunlik kasallanishlar soni 100 tadan kamaymayotgan edi.

Illyustratsiya: Sog‘liqni saqlash vazirligi matbuot xizmati

Bundan tashqari, 25-iyulda kun davomida 482 nafar kishida pnevmoniya aniqlandi (taqqoslash uchun, 24-iyul kuni 494 kishida, 25-iyul kuni 507 kishida (yil antirekordi) pnevmoniya tasdiqlangan edi).

Shuningdek, 25-iyulda kun davomida Qoraqalpog‘istonda 97 nafar, Jizzax viloyatida 119 nafar, Qashqadaryo viloyatida 29 nafar, Navoiy viloyatida 17 nafar, Namangan viloyatida 18 nafar, Samarqand viloyatida 183 nafar, Surxondaryo viloyatida 141 nafar, Farg‘ona viloyatida 68 nafar, Xorazm viloyatida 22 nafar, Toshkent viloyatida 59 nafar, Toshkent shahrida 58 nafar bemor — mamlakat bo‘yicha jami 811 nafar bemor tuzalib, jami sog‘ayganlar soni 119 449 nafarga (kasallikka chalingani rasman qayd etilganlarning 95 foizi) yetdi.

“Shuningdek, 7 nafar koronavirusga chalingan bemor vafot etib, kasallikdan vafot etganlar soni 839 nafarni tashkil qildi”, — deyiladi SSV axborotida. 25-iyul yakunlariga ko‘ra, mamlakat kasalxonalarida davolanayotgan bemorlar soni 4707 nafarni (pnevmoniyaga chalinganlarni ham qo‘shib hisoblaganda — 5189 nafarni) tashkil etmoqda — bu 24-iyuldagi davolanayotgan bemorlar sonidan 113 nafarga (pnevmoniyaga chalinganlar sonini ham qo‘shib hisoblaganda — 125 nafarga) kam.