Toshkent shahrida 5-, 7- va 8-iyul kunlari so‘nggi 150-yillikdagi aynan shu kunda qayd etilgan eng issiq havo harorati rekordlari yangilandi, deb xabar bermoqda “O‘zgidromet”.
Foto: “Daryo” / Madina Nurman
Gidrometeorologiya xizmati markazining ma’lum qilishicha, poytaxtda 150 yildan buyon havo harorati qiymatlari muntazam kuzatib kelinadi. Iqlim o‘zgarishi natijasida dunyoda iqlim isishi tezlashdi. Bu kunning tungi paytlarida ham havo haroratining ko‘tarilib ketishida yaqqol namoyon bo‘lmoqda.
Tungi harorat ko‘tarilishi havoga ko‘p miqdorda is va boshqa iflos gazlarning me’yordan ko‘p chiqarilishida, ya’ni issiqxona effekti jarayonida vujudga kelmoqda. Issiqxona effekti iqlim isishini yuzaga keltirib, sutka davomidagi maksimal va minimal havo harorati qiymatlari orasidagi farqni kamaytirmoqda. Bu esa o‘z navbatida o‘rtacha sutkalik havo harorati qiymatini yuqorilashiga olib kelmoqda.
“O‘zgidromet” 1-iyul kuni 3—8-iyul kunlari O‘zbekistonda o‘rtacha sutkalik havo harorati ko‘p yillik iqlimiy me’yordan 5-8 daraja yuqorilashi haqida ogohlantirish xabarini bergandi.
Qayd etishicha, Toshkent shahrida iyul oyi boshlarida kuzatilgan kunlik havo harorati o‘tmishda rekord issiq qiymatlar qayd etilgan aynan o‘sha kundagi kunlik o‘rtacha haroratdan ancha ko‘tarilgani qayd etildi. Kunlik maksimum qiymatlar bilan birgalikda sutkalik o‘rtacha havo haroratlari ham yuqorilamoqda.
Xususan, 1881-yil 6-iyul kuni Toshkent shahrida aynan shu kun uchun mutlaq rekord qayd etilgan (+44,1 daraja). Lekin o‘shanda o‘rtacha sutkalik havo harorati ancha past qiymatda kuzatilgan (+28,1 daraja). 2021-yil 6-iyul kuni sutkalik maksimal havo harorati rekord ko‘rsatkichdan ancha past (+41,5 daraja) qayd etilgan bo‘lsa-da, o‘rtacha sutkalik havo harorati 1881-yildagi o‘rtacha sutkalik havo harorati qiymatidan qariyb 5,5 darajaga yuqori kuzatilgan.
2021-yilning o‘tgan iyun oyida respublika hududlarida o‘rtacha oylik havo harorati ko‘p yillik iqlimiy me’yordan 1-3 daraja yuqori bo‘lgan.
Eslatib o‘tamiz, Toshkentda 3—7-iyundagi issiq ob-havo uch asr avvalgi rekorddan yuqori bo‘lgandi.
