Koronavirusga qarshi kurashish shtabi a’zosi Nurmat Otabekov O‘zbekistonda nega keskin, qattiq karantin choralari kiritilmayotganiga javob berdi.

“Karantin va cheklov talablari keskin va qattiq talablar asosida amalga oshiriladigan bo‘lsa, bu ko‘p oilalarni hayot tarzi, ularning iqtisodiy ahvolini tang holatga keltirib qo‘yish nuqtayi nazaridan bu kabi tadbirlarni o‘tkazishga, keskin choralarni qo‘llashga qo‘l urilmayapti.

Albatta, bu kabi tadbirlarni qo‘llab, vaziyatni tezda barqarorlashtirishga erishish mumkin bo‘ladi. Vaziyatga qarab qo‘shimcha cheklovlar kiritib kelinyapti”, – deydi Nurmat Otabekov.

Respublikada emlash tadbirlari sust olib borilayotgani, uni majburiy va pullik qilib qo‘yish bo‘yicha mutaxassis quyidagilarni ma’lum qildi.

“Respublika bo‘yicha emlashning to‘liq kursini olgan fuqarolar soni 700 mingta yaqinlashdi. Emlashning turli bosqichlarini olganlar soni 4 million 200 mingdan ko‘proq. Bu raqam kam. Qachonki aholining 60–70 foizini emlamas ekanmiz, vaziyatni barqaror ushlash imkonsiz.

Vaksinani majburiy qilish to‘g‘ri fikr. Balki, Rossiyada qo‘llanilayotgan amaliyot, ya’ni emlanmagan odamlarni ishga qo‘ymaslik amaliyotini tatbiq qilish kerakdir. Lekin hozircha O‘zbekistonda vaksinalar tekin va ixtiyoriy ravishda amalga oshiriladi”, – deydi Nurmat Otabekov.

Ma’lumot uchun, O‘zbekistonda 28-iyundan karantin cheklovlari kuchaytirildi. Toshkent shahriga 28-iyundan transport vositalari kirishiga hamda ko‘ngilochar va ovqatlanish obyektlari faoliyatiga cheklovlar o‘rnatildi. 5-iyuldan boshlab esa barcha turdagi ommaviy tadbirlarni o‘tkazish vaqtincha to‘xtatildi. 1-avgustdan esa to‘y va marosimlarni 50 kishidan ko‘p bo‘lmagan holda o‘tkazish belgilandi.