“Oltin to‘p” reytingidagi keskin o‘zgarish, Braziliya yana finalda va “Barselona” bilan sudlashishga tayyor futbolchilar. Eng so‘nggi sport yangiliklari

Dunyo va o‘zbek sportiga oid 6-iyul tongining muhim xabarlari dayjesti bilan tanishing.

O‘zbekiston

Tojikistonda “CAFA U-17 Women’s Championship—2021” musobaqasi davom etmoqda. O‘zbekiston U-17 ayollar terma jamoasi 2-turda Eron vakillari bilan kurash olib bordi. Leyla Rustullayevaning dubli o‘zbekistonlik qizlarga g‘alaba keltirdi. Avvalroq O‘zbekiston mezbon jamoaga qarshi o‘yinda durang qayd etgandi.

Jahon

Yevro—2020 yarim final uchrashuvlari start oladi. 6-iyuldan 7-iyulga o‘tar kechasi Italiya va Ispaniya o‘rtasida dastlabki yarim final bahsi bo‘lib o‘tadi. Ertasi kuni esa Angliya va Daniya masalaga oydinlik kiritadi. Har ikki o‘yin 00:00 da boshlanadi.

UEFA Yevro—2020 yarim final va finalida foydalaniladigan to‘pni namoyish qildi. To‘p London timsollari bilan qoplangan — hal qiluvchi uchta o‘yin aynan o‘sha yerda bo‘lib o‘tadi.

Italiya terma jamoasining Yevropa chempionatida kashfiyoti Leonardo Spinatssola muvaffaqiyatli operatsiya qilindi. Avvalroq futbolchi musobaqa chorak finalida Belgiya qarshi o‘yinda tovon paylarini shikastlab olgan va uzoq muddatga safdan chiqqandi.

Kopa Amerika—2021 ning dastlabki yarim finali bo‘lib o‘tdi va Braziliya terma jamoasi Lukas Paketaning yagona goli evaziga Peruni mag‘lub etib, finalga yo‘l oldi. Tite shogirdlari hal qiluvchi bahsda Argentina — Kolumbiya uchrashuvi g‘olibi bilan kuch sinashadi.

Goal nashri “Oltin to‘p”ga da’vogarlar reytingini yangiladi. Unga ko‘ra, Unga ko‘ra Argentina terma jamoasi va “Barselona” klubi hujumchisi Lionel Messi yetakchiga aylangan. Avvalroq Messi 6-o‘rinda borayotgandi. Ro‘yxat bilan tanishing:

1. Lionel Messi (“Barselona”, Argentina);

2. Robert Levandovski (“Bavariya”, Polsha);

3. Ngolo Kante (“Chelsi”, Fransiya);

4. Romelu Lukaku (“Inter”, Belgiya);

5. Kilian Mbappe (“PSJ”, Fransiya);

6. Kevin de Bryuyne (“Manchester Siti”, Belgiya);

7. Krishtianu Ronaldu (“Yuventus”, Portugaliya);

8. Rahim Sterling (“Manchester Siti”, Angliya);

9. Erling Holand (“Borussiya D”, Norvegiya);

10. Neymar (“PSJ”, Braziliya).

Robert Levandovski muxlislar tanloviga ko‘ra “Bavariya”ning 2020/21-yilgi mavsumdagi eng yaxshi o‘yinchisi deb topildi. Polshalik futbolchi ovozlarning 76,8 foiziga egalik qilgan. Keyingi o‘rinlardan Tomas Myuller (10,3%) va Yozua Kimmix (6,9%) joy oldi.

Braziliyalik yarim himoyachi Mateus Fernandes “Barselona”gi sudga beradi. Avvalroq katalon klubi o‘yinchi bilan shartnomani bir tomonlama bekor qilgandi. Marca xabariga ko‘ra, Fernandes klubning bu harakatidan norozi bo‘lgan va “Barsa”ni sudga bermoqchi. “Barselona” futbolchini 2020-yilning yozida “Palmeyras”dan 7 million yevro evaziga sotib olgandi.

Gap shundaki, katalonlar Lionel Messi bilan yangi shartnoma imzolash va boshqa transferlarni amalga oshirish uchun futbolchilarini sotishi yoki maoshlar vedomostini qisqartirishi kerak. Shu sabab jamoa Frenandes bilan shartnomani bekor qildi. Bu ishni Samyuel Umtiti va Miralem Pyanich bilan ham qilmoqchi. Biroq fransiyalik va bosniyalik futbolchilar bunga rozi bo‘lmadi. Umtiti bu ish amalga oshsa, FIFAga arz bilan chiqishni xohlayotgani haqida xabarlar yangragandi.

Formula-1 bo‘yicha yetti karra Jahon chempioni Lyuis Hemilton Mercedes bilan 2023-yil oxiriga qadar mo‘ljallangan shartnoma imzoladi. Xabar qilinishicha angliyalik poygachi bu shartnoma orqali yiliga 55 million dollar daromad topadi. Hemilton nemis brendi bilan 2013-yildan beri hamkorlik qiladi.