Muhtasham qaytish: Maryam Uzerli yangi filmda Juliya Roberts o‘ynashi kerak bo‘lgan qahramon rolini ijro qiladi

Nafaqat Turkiya, balki butun dunyoga mashhur “Muhtasham yuz yil” serialida Xurram sulton rolini gavdalantirgan aktrisa Maryam Uzerli qanday loyihada ishtirok etishi haqida ma’lumot berdi.

Muxlislar uzoq vaqt davomida Maryamning yangi ijrolar bilan ekranga qaytishini kutgan, matbuotlarda uning ishtiroki haqida yangiliklar tarqalgan, ammo bularning bari haqiqatdan yiroq bo‘lgan. Bu safar aktrisaning o‘zi ma’lumot bergan va allaqachon suratga olish ishlari boshlanganini aytib o‘tgan. Gap Juliya Roberts uchun yozilgan “Go‘zal bir tush” loyihasi haqida ketyapti.

Amerikan HistoriX prodyuserlik kompaniyasi ko‘magida suratga olinadigan loyihaga Alp Kamber rejissorlik qiladi. Ma’lum qilinishicha, aynan amerikalik prodyuserlar Juliyaning nomzodini Maryamga almashtirishni taklif qilgan.

Avvalroq aktrisa Berlindan Turkiyaga nafaqat yangi ish, balki qiziga go‘zal mamlakatni ko‘rsatish uchun ham qaytganini ma’lum qilgan. Uning Turkiyada qanchalik uzoq qolishi, suratga olish ishlari yakuniga yetganidan keyin Germaniyaga qaytish yoki qaytmasligi hali ma’lum emas, ammo aktrisa hozircha ijtimoiy tarmoqlarda Istanbulga qaytganidan xursandligini takrorlashdan charchamayapti.