Prezident Shavkat Mirziyoyev raisligida oliy ta’lim tizimidagi ustuvor vazifalar muhokamasiga bag‘ishlangan videoselektor yig‘ilishi bo‘lib o‘tdi.

Foto: Prezident matbuot xizmati

“Islohotlar qachon amalga oshadi? Agar har bir yo‘nalishda mutaxassislar bilimli bo‘lsa, natija biz kutgandek bo‘ladi. Biz oliygohlarni ko‘paytirdik. Ularning sifati qanday degan savol turibdi.

Viloyat hokimlari o‘z hududingizdagi oliy ta’lim muassasasi hayoti bilan qiziqib ko‘rganmisiz? Yoshlarga qanday bilim berilyapti, yashash joyi qanday? Qaysi tarmoq bilan birlashtirish mumkin ta’lim muassasasini? Hech qaysi viloyat, shahar hokimini bu savol qiynamayapti”, – deydi Prezident.

Shavkat Mirziyoyev nutqi davomida rektorlarni “eng katta islohotchi” deb atadi.

“Agar oliygohda bilimli rektor bo‘lsa, bu xalqimizning baxti. Bu balandparvoz gap emas. Rektorning dunyoqarashi viloyat, shahar hokiminikidan baland bo‘lishi kerak. Men rektorni eng katta islohotchi, fidoyi, deb bilaman.

Agar u yoshlarni bilimli qilib tarbiyalay olsa, bizga boshqa hech narsa kerak emas. Lekin hamma rektorlar shundaymi? Sifat bilan shug‘ullanmagan, ‘talaba uchun men nima bera olaman’ degan savolga javobi bo‘lmagan rektorning kelajagi yo‘q”, – deydi Prezident.

Shuningdek, Prezident yaqin vaqtgacha davlat oliygohlari monopoliya bo‘lganini aytdi.

“Oliy ta’lim muassasalari soni 117 tani tashkil qilyapti. Qabul o‘rni 66 mingdan 181 mingga, ya’ni 3 baravar ortgan. Ammo bu yerda sifat yo‘q. Professor-o‘qituvchilarning oyligi 3,5 baravarga oshirildi. O‘qishga hujjat topshirayotganlar ham 2 baravar ko‘p. Bir narsani aniq tushunish kerak. Yaqin-yaqingacha davlat oliygohlari monopoliya bo‘lgan. Va bundan foydalanib kelgan. So‘nggi yillarda sohaga raqobat kirib keldi, xususiy va xorijiy oliygohlar ko‘paymoqda va bu vaziyatni o‘zgartiradi”, – deydi davlat rahbari.

Ma’lum qilinishicha, bugungi kunda 815 ta yo‘nalishning 55 foizi mehnat bozori talablariga javob bermaydi.

OTMlar 2 mingga yaqin fanlar bo‘yicha darsliklar bilan ta’minlanmagan, o‘quv dasturlari bundan 40 yil oldingi fan va yo‘nalishlar asosida tuzilgan.

Bundan avval Baxtiyor Mahkamov Toshkent axborot texnologiyalari universitetining rektori vazifasini bajaruvchi etib tayinlangani hamda O‘zbekistondagi OTM bitiruvchilariga diplom olish uchun ish beruvchi korxonalardan shartnoma olib kelish yuzasidan topshiriq berilmagani ma’lum qilingani haqida xabar berilgandi.