Everestdagi alpinistlar orasida COVID-19 tarqaldi, Britaniya samaradorlikni oshirish uchun vaksinani uchta dozada kiritadi, AQSh o‘smirlar uchun vaksinani ma’qullaydi. Koronaxabarlar

Jons Hopkins universiteti ma’lumotlariga ko‘ra, dunyoda COVID-19’ni yuqtirib olganlar soni 153 977 028 kishiga yetgan. Kasallanganlar soni bo‘yicha AQSh (32,5 million), Hindiston (20,2 million), Braziliya (14,8 million), Fransiya (5,7 million) va Turkiya (4,9 million) eng oldinda bormoqda. Dunyo bo‘yicha o‘limlar soni esa 3 223 800 kishiga yetgan.

Everestdagi alpinistlar orasida koronavirus tarqaldi

Everest tog‘idagi tayanch lageri alpinistlari va Nepal hukumati ma’lum qilishicha, COVID-19 belgilari bo‘lgan alpinistlar soni o‘sishi kuzatilmoqda, bu esa pandemiya avj olishi yuzasidan xavotir uyg‘otmoqda.

Tayanch lageri va boshqa lagerlardan davolanish uchun Katmandu kasalxonasiga yuborilgan ekpeditsiya ishtirokchilarining 17 nafarida virus aniqlangan.

Nepal hukumati mashhur tog‘ning ekspeditsiyalar uchun yopib qo‘yilishidan xavfsirab, shu paytgacha tayanch lagerida COVID-19’ga nisbatan testlar ijobiy chiqqani haqidagi har qanday ma’lumotlarni rad etib kelayotgan edi. Chet ellik alpinistlar Nepal hukumati uchun asosiy daromad manbasi bo‘lib hisoblanadi. Everest o‘tgan yili pandemiya chog‘ida yopilgan edi, endi esa alpinistlardan Nepalga yetib kelganidan keyin, tayanch lageriga ketishdan avval karantindan o‘tishni talab qiladi.

So‘nggi haftalar ichida Nepalda koronavirus bilan kasallanish holatlari keskin ko‘paydi. U Hindiston bilan qo‘shni mamlakatlar orasida eng yuqori kasallanish darajasiga ega.

Britaniya COVID-19’ga qarshi vaksinaning uchinchi dozasi bilan kurashmoqchi

Buyuk Britaniya hukumati 50 yoshdan oshgan odamlarga pandemiyaga, xususan, yangi shtammlar tarqalishiga qarshi samaraliroq kurashish uchun koronavirusga qarshi vaksinaning uchinchi dozasini olishni taklif qilmoqchi.

Ayni paytda ikkita variant: koronavirus mutatsiyalariga qarshi kurashish uchun maxsus ishlab chiqilgan vaksinalardan foydalanish yoki mamlakatda ishlatilayotgan vaksinalarning uchinchi dozasini joriy qilish ko‘rib chiqilmoqda.

Uchinchi marta emlanishni hukumat keksalardan tashqari, boshqa hamroh kasalliklari tufayli xavf guruhida bo‘lgan odamlarga ham taklif qilmoqchi.

Ma’lumotlarga ko‘ra, yuqoridagi ikki variant bo‘yicha o‘tkazilgan ilk tadqiqotlar Britaniya hukumatida mavjuda va yangi mutatsiyalarga qarshi kurash uchun shular yetarli bo‘lishi haqida umid uyg‘otgan.

AQShda kelasi hafta o‘smirlar uchun Pfizer vaksinasi ma’qullanishi mumkin

Prezident Jo Bayden 4-may, seshanba kuni aholini COVID-19’ga qarshi immunizatsiya qilishning yangi bosqichi haqida e’lon qildi, u 12—15 yoshli bolalarga urg‘u berilishini ko‘zda tutadi.

Ayni paytda AQShda 16 yoshgacha bo‘lgan o‘smirlar uchun maxsus vaksina bo‘lmasa-da, FDA (Oziq-ovqat mahsulotlari va dorilar sifatini nazorat qilish boshqarmasi) kelasi hafta ushbu yosh toifasi uchun vaksinadan foydalanish uchun ruxsatga tuzatishlar kiritishni ma’qullashi kutilmoqda.

Baydenning aytishicha, FDA’ning ruxsatidan keyin hukumat o‘smirlarni emlash uchun butun mamlakat bo‘ylab 20 mingta vaksina maydonlarini zudlik bilan ochishga tayyor.

Shuningdek, Bayden AQSh o‘z vaksinalarining bir qismini boshqa mamlakatlarga yuborishini ma’lum qildi.

“Biz shu oydan boshlab iyungacha COVID-19’ga qarshi AstraZeneca vaksinasining 60 millionta dozasini boshqa mamlakatlarga yuborish majburiyatini o‘zimizga oldik. Bu shuni bildiradiki, biz shu vaqt ichida AQSh uchun tayyorlangan jami vaksinalarning 10 foizi dunyoning qolgan qismiga yuboriladi”, — dedi Amerika prezidenti.

AQShda ayni paytda taxminan 10 million doza vaksina bor, yana 50 millioni 2021-yilning may—iyunida tayyor bo‘ladi.

Shu bilan birga Bayden AQSh o‘z vaksinasini aynan qaysi mamlakatlarga yuborishiga aniqlik kiritmadi.

Yevropa ittifoqida koronavirusga qarshi 150 million kishi emlandi

Yevroittifoqda 150 million kishi COVID-19’ga qarshi emlandi. Voyaga yetgan aholining to‘rtdan bir qismi vaksinaning birinchi dozasini olgan.

Yevrokomissiya rahbari so‘zlariga ko‘ra, iyulda aholining 70 foizini emlash uchun yetarlicha vaksina bo‘ladi.