“137 ta mahalladagi 431 ta ikki qavatli uy avariya holatida” — Shavkat Mirziyoyev

Bugungi kunda O‘zbekistonda eng og‘ir ahvolga tushib qolgan 796 ta qishloq va 188 ta shahar mahallalari mavjud. Bu haqda Prezident Shavkat Mirziyoyev raisligida “Obod qishloq” va “Obod mahalla” dasturlarini 2021-yilda amalga oshirish masalalari muhokamasiga bag‘ishlab o‘tkazilgan videoselektor yig‘ilishida ma’lum qilindi, deya xabar bermoqda “Daryo” muxbiri.

“Barcha hududlarda aholi bilan ishlashda kamchiliklar mavjud. 137 ta mahalladagi 431 ta ikki qavatli uy avariya holatida. Xuddi shu kabi 4 mingdan ziyod mahallaning elektr ta’minoti qoniqarsiz ahvolda.

Qishloqlarga infratuzilma borsagina, tadbirkorlik rivojlanishini, qo‘shilgan qiymat yaratilishini barcha rahbarlar chuqur anglab yetishi kerak. Shu sababli, ‘Obod qishloq’ va ‘Obod mahalla’ dasturlari mutlaqo yangi yondashuvlar asosida shakllantirildi.

Topshirig‘imga ko‘ra, 206 ta tuman va shahar hokimlari, yo‘l, elektr, kommunal xizmat va tadbirkorlikka mas’ul rahbarlar bilan birma-bir gaplashib, qishloq va mahalla aholisi bilan maslahat qilinib, 8 mingta mahallada bajarilishi lozim bo‘lgan aniq ishlar belgilab olindi.

Bunda, obodonchilik bilan bir qatorda, ‘temir daftar’, ‘ayollar’ va ‘yoshlar’ daftarlariga yangi ishlab chiqarish obyektlari, ish o‘rinlari yaratish, aholini ijtimoiy xizmatlar bilan qamrab olish orqali ularni ushbu ro‘yxatlardan chiqarish masalalari ham ko‘zda tutilgan”, — dedi davlat rahbari.