AQShda Ikkinchi jahon urushi sabab maktabni tashlab ketgan faxriyga 77 yil o‘tib diplom topshirildi
18-mart kuni Ikkinchi jahon urushi faxriysi Viskonsindagi Waterford Union maktabi diplomini oldi. 77 yil oldin u armiyada xizmat qilish maqsadida o‘qishni tashlashga majbur bo‘lgan, deb yozadi Esquire.
96 yoshli Raymond Shefer Rasin okrugidagi qishloq xo‘jaligi maktabini 1940-yillarda tashlab ketishga majbur bo‘lgan, 1959-yilda esa maktab yopilgan. Keyinroq u Ikkinchi jahon urushida qatnashishga otlangan.
Urushdan omon qaytgan Raymond o‘nlab yillar davomida uskunalar ishlab chiqarish zavodida ishlagan. Sheferning do‘stlarini so‘zlariga ko‘ra, u o‘qishni tashlab ketganidan afsuslangan. “ ‘Maktab diplomim bo‘lishini xohlardim, lekin men juda ahmoqman’, derdi. Ammo aslida bundan emas. Axir u oilasiga yordam berish uchun maktabni tashlab ketdi-ku”, — deydi oilaning yaqini Sintiya Bennett.
Bennett va faxriyning boshqa do‘stlari maktab rahbariyati bilan Sheferni bitiruvchi deb tan olish bo‘yicha kelishishga muvaffaq bo‘lgan.
Shefer uchun kutilmagan marosim tashkil etilib, unga faxriy diplom va esdalik medalyoni, shuningdek, an’anaviy mantiya va shapka topshirilgan. Marosimga urush faxriysining do‘stlari, oila a’zolari, talabalar va orkestr jamoasi kelgan.
“Raymond nafaqat o‘z mamlakati, balki butun dunyo uchun xizmat qildi”, — deydi marosimda chiqish qilgan maktab direktori Den Foster.
Sheferning so‘zlariga ko‘ra, u “buni juda uzoq kutgan” va bu uchun “juda-juda muhim”.
