O‘zbekiston Shavkat Mirziyoyevning Moskvaga tashrifi 2021-yilda bo‘lishiga umid qilmoqda. Bu haqda O‘zbekiston TIV rahbari Abdulaziz Komilov Rossiya TIV rahbari Sergey Lavrov bilan 2-mart kuni o‘tkazilgan uchrashuvda ma’lum qildi.
“Albatta, ikki tomonlama munosabatlar kun tartibida asosiy masala — tashrif (O‘zbekiston prezidentining Rossiyaga tashrifi — tahr.)… Tashrif sanalariga kelsak, men bu to‘g‘risida Shavkat Miromonovich bilan gaplashdim. Albatta, biz vaziyatga qarab ish tutamiz, lekin baribir onlayn tadbirlarni o‘tkazmaslikni xohlardik, (uchrashuv) rasmiyatchilikka bo‘lib qolmasligi uchun. Biz shaxsiy uchrashuvlar bo‘lishini xohlardik. Bu borada vaziyatga qaraymiz va hali maslahatlashamiz”, — deya Abdulaziz Komilovning so‘zlarini keltirgan “Gazeta.uz”.
Vazir, shuningdek, oldinda 24-oktabrda o‘tkazilishi belgilangan prezident saylovi tashvishi turganini, agar ungacha o‘tkazishga ulgurilmasa, unda prezident saylovidan keyin birinchi tashrifni Rossiyaga amalga oshirish taklifi borligini bildirgan.
Abdulaziz Komilov, shuningdek, O‘zbekistonda koronavirusga chalinish holatlari kamayganini, bu muayyan sohalarda ikki tomonlama hamkorlikni tiklashni muhokama qilishga imkoniyat berishini qayd etgan.
“Qo‘shnilar bilan munosabatlarga kelsak, u haqiqatan ham ma’lum jihatdan to‘xtatilgan edi. Ammo hozirda biz bularni ochyapmiz va hammasini tiklaymiz”, — deb qo‘shimcha qilgan vazir.
Bundan tashqari, O‘zbekiston TIV rahbari mintaqadagi siyosiy vaziyat dinamik tarzda rivojlanayotganini ta’kidlagan.
Eslatib o‘tamiz, Shavkat Mirziyoyev Moskvada oxirgi marta 2020-yilning iyun oyida amaliy tashrif bilan bo‘lgan edi.
Avvalroq O‘zbekiston transport vaziri o‘rinbosari Jasurbek Choriyev O‘zbekiston COVID-19 bilan bog‘liq epidemiologik vaziyat yaxshilanayotganini hisobga olib mart—aprel oylarida Rossiya bilan muntazam aviaqatnovlarni tiklashga umid qilayotganini bildirgani haqida xabar berilgan edi.
Izoh (0)