Samarqand viloyatida 2019/2020-o‘quv yili yakunida mavjud 1255 ta umumta’lim maktabining 142 tasini bitirgan bitiruvchilarning hech biri oliy ta’lim muassasasiga o‘qishga kirmagan. Bu haqda viloyat xalq ta’lim boshqarmasi boshlig‘i Zebiniso Shodiyeva ma’lum qildi, deya xabar berdi “Daryo” muxbiri.
Ta’kidlanishicha, viloyatda bitiruvchilari OTMga o‘qishga kirgan maktablar soni bo‘yicha Qo‘shrabot tumani 29 ta maktab bilan yuqori natijani ko‘rsatgan bo‘lsa, Pastdarg‘om 19 ta, Urgut 17 ta, Payariq 15 ta, Nurobod 14 ta, Bulung‘ur 13 va Kattaqo‘rg‘on tumani 10 ta maktab bilan keyingi pog‘onalarni egallagan.
Ushbu 142 ta maktab direktorining 41 nafari ogohlantirilib, 48 nafariga hayfsan, 7 nafariga 30 foiz intizomiy jazo chorasi qo‘llanilgan. Qolgan 45 nafari bilan esa mehnat shartnomasi bekor qilingan.
“Bugungi kunda umumta’lim muassasalarida 56 370 nafar pedagog-xodim faoliyat olib bormoqda. Ularning malakasini oshirish, oliy, birinchi va ikkinchi toifali o‘qituvchilar safini kengaytirish bo‘yicha ham amaldagi huquqiy hujjatlarimizga muvofiq ishlar amalga oshirilmoqda. Jumladan, Vazirlar Mahkamasining 2019-yil 13-maydagi qaroriga asosan attestatsiya pedagog kadrlar uchun har besh yilda bir marta yoki pedagoglarimizning yozma arizalariga binoan navbatdan tashqari attestatsiyadan o‘tkazilishi mumkin. Bu yangilik o‘z natijasini ko‘rsatmoqda. So‘nggi uch yil oralig‘ida oliy toifali o‘qituvchilarimiz 809 nafardan 1278 nafarga yoki 1,6 foizdan 2,3 foizga ko‘paydi. Joriy yilda bu ko‘rsatkichni 4 foizga chiqarishni maqsad qilganmiz. Bu borada keng imkoniyat yaratilganidan so‘ng xuddi shunday birinchi va ikkinchi toifali o‘qituvchilarimiz soni ham ortib, nafaqat ularning moddiy rag‘bati, balki o‘z-o‘ziga talabchanligi ham ortib bormoqda”, — deydi boshqarma boshlig‘i Zebiniso Shodiyeva.
Izoh (0)