Serbiya politsiyasi mamlakat prezidenti Aleksandr Vuchichga suiqasd tayyorlangani haqida tezkor xabar berdi. Bu 27-yanvar — O‘rta asr Serbiya davlati asoschisi Stefan Neman yodgorligi ochilgan kuni Belgradda sodir bo‘lishi rejalashtirilgan. Bu haqda kriminal politsiya bo‘limi boshlig‘i Bogdan Pushichning Pink kanalida bergan ma’lumotlariga tayanib “TASS” xabar berdi.
Pushichning so‘zlariga ko‘ra, Belgraddagi yodgorlikning ochilish marosimida rejalashtirilgan suiqasddan davlat rahbarini himoya qilish uchun 850 dan ortiq maxsus xizmat xodimi qatnashdi.
Serbiya huquqni muhofaza qilish organi xodimlari 4-fevral kuni Belgradda maxsus operatsiya davomida uyushgan jinoiy guruhning 17 a’zosini hibsga oldi. Uyushgan jinoiy guruh futbol muxlislari ko‘rinishida niqoblangan, shuning uchun tezkor tadbir “Partizan” va “Rayko Mitich” stadionlari (“Srvena Zvezda” klubining arenasi)da bo‘lib o‘tdi. Mamlakat Ichki ishlar vazirligining ma’lumotlariga ko‘ra, qo‘lga olingan gumonlanuvchilarning uyidan ikki dona snayper vintovkasi topilgan. Gumonlanuvchilar qotillik, odam o‘g‘irlash, tovlamachilik va giyohvand moddalar bilan shug‘ullanishda ayblanyapti. Lekin ularning prezident Vuchichga suiqasd uyushtirishga uringanini isbotlovchi aniq dalillar hali topilmagan. Ayni vaqtda surishtiruv ishlari olib borilmoqda.
Aleksandr Vuchich 2020-yilning 20-oktabrida mafiyaga qarshi rasmiy ravishda urush e’lon qilgan. O‘shanda mamlakat prezidenti jinoyat olami hukumat ustidan hech qachon g‘alaba qozona olmasligini ta’kidlagan.
O‘tgan oylar mobaynida Belgradda bir nechta buyurtmali qotilliklar amalga oshirildi. 2020-yil 13-sentabrda jinoiy avtoritet Straxinya Stoyanovich shunday qotillik qurboniga aylandi, uning mashinasi shahar markazida harakatlanayotganda portlatib yuborildi. Keyinroq “Ushche” savdo markazining yerosti avtoturargohida ham qotillik sodir etilgan. Bundan tashqari, Yangi Belgradda mafiyaga aloqadorligi taxmin qilingan shaxs uyining yerosti turargohida otib ketilgan.
Izoh (0)