Italiyalik dizaynerlar bortiga Tesla pikapi sig‘adigan 25 metrli katamaran-amfibiya loyihasini taqdim etdi (foto)
Lazzarini studiyasining italiyalik dizaynerlari quruqlikda ham, suvda ham harakatlanishga qodir Pagurus premium yaxtasining loyihasini taqdim etdi. Bortida Tesla elektromobili bo‘lgan 25 metrli amfibiya 30 million dollarga baholangan, deb yozadi Motor.
Pagurus (qisqichbaqa turlaridan birining nomi) loyihasining asosini klassik katamaran tashkil etadi. Kemaning 31 foizi uglerod plastikdan, 69 foizi esa pishiq po‘latdan ishlanadi. Yaxtaga quyosh batareyalari, 900 ot kuchiga ega dizel dvigatel va elektromotorlar o‘rnatilgan. Katamaran akkumulyatorlari quyoshdan, shuningdek, suvdagi vintlarning harakati vaqtida paydo bo‘ladigan energiyaning rekuperatsiyasi hisobiga quvvatlana oladi.
Noyob loyihaning o‘ziga xosligi uning amfibiya kabi imkoniyatlarida. Katamaran tubiga to‘rtta olti metrli Arximed parragi yashiringan bo‘lib, ularning har birini 440 ot kuchiga ega dizel dvigatel harakatga keltiradi. Yaxta sayoz joyga kelganida birgina tugma bosilishi bilan ulkan po‘lat parraklar osonlikcha kemani qirg‘oqqa olib chiqadi. Pagurus’ning suvdagi maksimal tezligi soatiga 46 kilometrga, quruqlikda esa 35 kilometrga yetadi.
Dizaynerlar tomonidan o‘ylangan yana bir g‘oyaga ko‘ra, amfibiyadagi yashirin bo‘lmaga turli texnikalarni joylashtirish mumkin — kvadrotsikldan tortib, Tesla Cybertruck pikapiga qadar. Yaxta quruqlikka chiqqanda elektr lift bir necha daqiqa ichida mashinani qattiq yuzaga tushirish imkonini beradi.
12 kishi sig‘adigan yaxtaning interyeri buyurmachining talabidan kelib chiqib bezatiladi.
