Energetika vazirligi Afg‘onistonga yetkazib berilayotgan elektr energiyasi bo‘yicha izoh berdi

O‘zbekiston Afg‘onistonga elektr energiyasi yetkazib berishi jamoatchilik orasida keng muhokamalarga sabab bo‘lgani sababli Energetika vazirligi bu borada izoh berdi.

Qayd etilishicha, Afg‘onistonda tinch hayotni o‘rnatish maqsadida O‘zbekiston va Afg‘oniston o‘rtasida elektr energiyasini yetkazib berish yuzasidan hukumatlararo kelishuv imzolangan.

Unga ko‘ra, tomonlarning majburiyatlari aniq belgilangan bo‘lib, ushbu kelishuvga asosan yillik 2 milliard 200 million kilovatt soat elektr energiyasini yetkazib berish ko‘zda tutilgan.

Mazkur kelishuv doirasida yetkazib berilayotgan elektr energiyasi ichki bozorga salbiy ta’sir ko‘rsatmasligini ta’minlash maqsadida qo‘shni davlatlar energotizimlaridan ham qo‘shimcha import qilinib, Afg‘onistonga uning bir qismi eksport qilinmoqda.

“Ta’kidlash joizki, Markaziy Osiyo mamlakatlarining yagona energotizimi Afg‘oniston energotizimi bilan faqatgina O‘zbekiston orqali bog‘langan, ya’ni yagona energotizim mamlakatlarida ishlab chiqarilgan elektr energiyasi faqatgina O‘zbekiston orqali eksport qilinishi mumkin.

Ushbu mavzular yuzasidan turli internet nashrlar va ijtimoiy tarmoqlardagi muzokaralar ayrim hollarda noto‘g‘ri raqamlar va faktlarga asoslangan bo‘lib, haqiqiy holatni aks ettirmayapti”, — deyiladi vazirlik bayonotida.

Ma’lumot uchun, 2020-yilning avgustida “O‘zbekiston milliy elektr tarmoqlari” AJ va Afg‘onistonning Da Afghanistan Breshna Sherkat kompaniyasi (DABS) o‘rtasida 10 yil muddatga elektr energiyasini yetkazib berish to‘g‘risida bitim imzolangan.

“Review.uz” ma’lumotlariga ko‘ra, Afg‘oniston elektr energiyasining asosiy qismini qo‘shni davlatlardan import qiladi. 2017–2018-yillarda importning umumiy hajmi 4,6 milliard kilovatt soatni tashkil etdi. Unga ko‘ra, O‘zbekiston – 2 milliard kilovatt soat, Tojikiston – 1,2 milliard kilovatt soat, Eron – 724 million kilovatt soat, Turkmaniston – 658,8 million kilovatt soat energiya yetkazib bergan.

Avvalroq O‘zbekiston elektr stansiyalaridagi texnik muammolar tufayli Afg‘onistonga yetkazib beriladigan elektr quvvati 450 megavattdan 300 megavattgacha tushib ketgani, shu sababli Kobulning aksariyat qismi elektr energiyasi bilan bog‘liq qiyinchiliklarni boshdan kechirgani haqida xabar berilgandi.