Ўзбекистондаги айрим автомобиль ишлаб чиқарувчилар берилган имтиёз ва преференцияларни қисқартириш ва бозорнинг барча иштирокчилари учун тенг шароитларни яратиш керак. Бу ҳақда 13 январь куни Президент раислигида ўтказилган йиғилишдан сўнг, Монополияга қарши курашиш қўмитаси раҳбари Нажмиддинхўжа Шарипов «Ўзбекистон 24» телеканалига берган интервьюсида маълум қилди.
Йиғилишда Президент Шавкат Мирзиёев хусусий инвесторлар мамлакатда умумий қиймати 276 миллион долларлик 8 та лойиҳани амалга ошириш таклифини билдираётганини маълум қилган. У «Ўзавтосаноат» фаолиятини трансформация қилиш, ишлаб чиқарувчилар учун тенг шароитлар яратиш ва саноат машиналарини йиғиш бўйича низомни тасдиқлатиш учун офис яратиш топшириғини берган.
«Автомобиль саноати мамлакатимиз иқтисодиётининг энг муҳим соҳаларидан бири ҳисобланади. Бир тарафдан ушбу соҳа кўплаб иш ўринларини яратади, заводларимиз атрофида кўплаб ишлаб чиқариш корхоналари шаклланмоқда, йилдан йилга солиқ тўловлари кўпаймоқда. Бошқа тарафдан эса автомобиль ишлаб чиқарувчимиз бозордаги монопол мавқеини сақлаб келяпти», — дейди Нажмиддинхўжа Шарипов.
Унинг сўзларига кўра, Президент мазкур соҳадаги рақобатни кучайтириш ва бозорнинг барча иштирокчилари учун тенг шароит яратиш топшириғини берган.
«Яъни мазкур соҳада имтиёз бериладиган бўлса, ушбу имтиёз барча корхоналарга тааллуқли бўлиши керак. Рақобатни ривожлантириш учун айрим ишлаб чиқарувчиларга берилган имтиёзлар ва эксклюзив ҳуқуқларни қисқартиришимиз, шунингдек, барча корхоналарни тенг шароитлар билан таъминлашимиз керак», — дейди қўмита раҳбари.
Нажмиддинхўжа Шариповнинг маълум қилишича, Президент томонидан қўйилган вазифаларни бажаришда Монополияга қарши курашиш қўмитаси биринчи навбатда, истеъмолчилар манфаатидан келиб чиқади.
«Ўзавтосаноат» раиси Шавкат Умрзоқовнинг маълум қилишича, Ўзбекистонда автомобилларни саноат йиғиши бўйича низом ишлаб чиқилиб, қабул қилинади. Унинг сўзларига кўра, бу Ўзбекистонга «таннарх борасидаги очиқ рақобатни, истиқболда автомбил соҳаси жозибадролигини ошириш»га ёрдам беради.
Иқтисодий тараққиёт ва камбағалликни қисқартириш вазири ўринбосари Бобур Абдуназаровнинг таъкидлашича, вазирлик автомобилсозлик ва қишлоқ хўжалиги техникаси тармоғини трансформация қилишга масъул этиб белгиланган.
Аввалроқ «Ўзавтосаноат» матбуот хизмати 2010–2020 йилларда тўланган солиқлар динамикасини эълон қилганди. Унга кўра, 2018 йилдан 2020 йилгача «Ўзавтосаноат» таркибига кирувчи корхоналар 9 триллион сўмдан ортиқ солиқ тўлаган. Шунингдек, «Ўзавтосаноат» тизимидаги автотранспорт воситалари ишлаб чиқарувчилари томонидан 2020 йил давомида янги автотранспорт воситаларини сотиб олганлик учун белгиланган йиғимлар тўланмаган. Масалан, UzAuto Motors томонидан 2020 йилнинг январь—сентябрь ойларида 582,6 миллиард сўм йиғим тўланмаган.
Изоҳ (0)