Buxoro viloyatining Olot tumanida yer maydoni ajratish evaziga fuqaroni 4000 dollar pora berishga undagan tuman hokimligi mas’ul xodimi 2000 ming dollarni olayotgan vaqtida qo‘lga olingan. Holat DXX hamda iqtisodiy jinoyatlarga qarshi kurashish departamentining viloyat boshqarmasi xodimlari hamkorligidagi tadbirda fosh etilgan, deya xabar berdi “Daryo” muxbiri.
Ma’lum bo‘lishicha, fuqaro Q.S. tuman hokimligi mas’ul xodimi J.Sh.ga Olot tuman markazidan savdo do‘koni qurish uchun 4 sotix yer maydoni ajratish bo‘yicha murojaat qilgan. J.Sh. esa fuqaroga yer maydoni ajratish evaziga 4000 dollarni pora tariqasida berishga undagan.
2020-yilning 22-dekabr kuni fuqaro tadbirkorlik faoliyatiga to‘siq bo‘layotgani haqida shikoyat qilib, holat yuzasidan huquq-tartibot idoralariga ariza bilan murojaat qilishga majbur bo‘lgan.
Shu kuni ariza yuzasidan huquq-tartibot idoralari tomonidan tezkor tadbir o‘tkazilgan hamda Olot tumani hokimi mas’ul xodimi J.Sh. fuqaro Q.S.dan Qorako‘l tuman hokimligi binosi oldida kimyoviy ishlov berilgan 2000 dollarni oldindan to‘lov sifatida olayotgan vaqtda ushlangan.
Mazkur holat yuzasidan J.Sh.ga nisbatan Jinoyat kodeksining 168-moddasi (firibgarlik) va 25-moddasi (jinoyatga tayyorgarlik ko‘rish va jinoyat sodir etishga suiqasd qilish) bilan jinoyat ishi qo‘zg‘atilib, tergovga tegishliligi masalasini hal qilish uchun hujjatlar viloyat prokuraturasiga yuborilgan.
Izoh (0)