“Navoiycha tender-2”. Viloyatdagi ko‘plab qurilish ishlari amaldorlarga aloqador kompaniyalar tomonidan bajarilgani ma’lum bo‘ldi

Navoiy viloyati hokimligi “Yagona buyurtmachi xizmati” injiniring kompaniyasi tomonidan o‘tkazilgan tender, tanlovlarda kompaniya rahbariyatiga taalluqli kompaniyalar doimiy ravishda davlat buyurtmalarini olib kelgani ma’lum bo‘lgandi. “Davletovuz” ochiq ma’lumotlarni o‘rganish asosida mazkur kompaniyaga rahbarlik qilgan yoki unda vakolatli shaxs sifatida ishlagan xodimlarning o‘zi va oilasiga taalluqli kompaniyalarning davlat buyurtmalarini olishi odatiy holga aylanganini aniqladi.

Xususan, uning bildirishicha, 2018-yilda “Yagona buyurtmachi xizmati” injiniring kompaniyasiga rahbarlik qilgan Bobomurodov Vohid Mustafoyevichga tegishli Navoiy Tears Invest MChJ, hisob-kitoblarga ko‘ra, oxirgi yillarda kamida 30 milliard so‘mlik davlat buyurtmalarini olgan (1-rasm).

Uning qarindoshi — Bobomurodov Obid Mustafoyevich “Farhod Farovon Lyuks” MChJga egalik qiladi. Ba’zi tanlov hujjatlarida faqatgina mana shu ikki kompaniya ishtirok etgan davlat buyurtmalari ham bor. Navoiy shahrida Bandlikka ko‘maklashish markaziga yordamchi bino qurish obyekti shular jumlasidan.

Ochiq ma’lumotlarga ko‘ra, uning yana bir ukasi — Bobomurodov Zohidjon Mustafoyevich ham 2020-yilning aprel oyida turar joy qurishga ixtisoslashgan Strong Oriental Houses MChJni tashkil qiladi. Mazkur MChJ ulushining yarmi Tursunov Faruxjon Kobulovich (ism-shariflari viloyat hokiminikiga o‘xshash)ga taalluqli.

Vohid Bobomurodovning Navoiy Tears Invest MChJ 2020-yilning noyabrida Navoiy shahrida “Ishga marhamat” mono-markazi yaratish bo‘yicha qariyb 22 milliard so‘mlik tenderni yutgan. Shuningdek, Navoiy Tears Invest MChJ Strong Home brendi ostida aholi uchun ko‘p qavatli uy-joylar ham quradi.

“Davletovuz” yana bir misol sifatida Navoiy viloyati hokimligi “Yagona buyurtmachi xizmati” injiniring kompaniyasida ma’lum vaqt texnadzor bo‘lib ishlagan Barakayev Karim Boboqulovichni keltirgan bo‘lib, u ham “Baraka-Bino” MChJga egalik qiladi. Karim Barakayev keyinchalik bo‘lib o‘tgan sud ishlaridan birida kompaniya unga tegishli ekanini yashirmagan (2-rasm). 2018-yil fevralida tashkil etilgan mazkur korxona allaqachon, hisob-kitoblarga ko‘ra, qariyb 13 milliard so‘mlik davlat buyurtmalarini olishga ulgurgan (1-rasm).

“Davletovuz” ushbu kompaniyaning qurilishlari sifatiga ham savollar borligini qayd etgan. O‘tgan yili oktabrda ommaviy axborot vositalari “Navoiy viloyatining Konimex tumanidagi 2-sonli “Oltin kalit” maktabgacha ta’lim tashkiloti 2020-yilning fevral oyida tantanali ravishda foydalanishga topshirilganligini ma’lum qilgandi. Bog‘cha qurilishi uchun 4 milliard so‘m sarflangan. Shunga qaramasdan, hozirda muassasa ta’mirtalab ahvolga kelib qolgan.

“Xullas, Navoiy viloyatida qurilish sohasidagi manfaatlar to‘qnashuvi, favoritizm, nepotizm kabi korrupsiyaviy holatlar faqat bular bilan to‘xtab qolmaydi. O‘rganishlarimiz ‘Yagona buyurtmachi xizmati’ xodimlari va viloyatdagi boshqa mansabdor shaxslarning muayyan kompaniyalarga aloqasi bo‘lishi mumkinligini ko‘rsatdi. Ammo ularni hozircha ochiq manbalar orqali aniqlash imkoni bo‘lmadi”, — deydi “Davletovuz”.

Avvalroq Korrupsiyaga qarshi kurashish agentligi Andijondagi 17 ta qurilish obyektida manfaatlar to‘qnashuviga oid holatlarni o‘rganayotgani haqida xabar berilgan edi.