Surxondaryo viloyati Muzrabod tumanida teplovoz temiryo‘l kesishmasiga chiqib qolgan Matiz avtomobilini urib yuborishi oqibatida haydovchi halok bo‘ldi. Bu haqda IIV YHXBB axborot xizmati xabar berdi.
Ma’lumotlarga ko‘ra, 10-dekabr kuni soat 13:30 larda Muzrabot tumani “At-Termiziy” mahallasi hududidan o‘tuvchi 4R102 avtomobil yo‘lining 43-kilometrida teplovoz Matiz’ni urib yuborgan.
Mazkur yo‘l-transport hodisasi temiryo‘l kesishmasida sodir etilgan bo‘lib, haydovchi mashinani temiryo‘l kesishmasi o‘rtasiga kelib o‘chirib qo‘ygan. Teplovoz haydovchisining bergan signallariga qaramay, mashina joyidan siljimagan. Sodir bo‘lgan YTH oqibatida haydovchi voqea joyida vafot etgan.
Avvalroq Surxondaryo viloyati prokuraturasi bo‘lim katta prokurori B.Ergashev teplovoz ishtirokidagi yo‘l-transport hodisasi qurboni bo‘lgani, baxtsiz hodisa tufayli viloyat prokurori o‘rinbosari X.Kulliyev tan jarohati olgani to‘g‘risida xabar berilgandi.
Izoh (0)