YouTube’dagi Deutsche Auto Parts kanalida Volkswagen Golf’ning ashaddiy ishqibozi bo‘lgan Stiv Smit ismli fuqaroga bag‘ishlangan video paydo bo‘ldi. Erkak butun umri davomida ixcham xetchbeklarni yig‘ish bilan shug‘ullangan. Ayni vaqtda uning 17 ta Golf’i bor bo‘lib, ulardan biri haqiqatda noyob, deb xabar beradi Motor.
Stiv Smitning aytishicha, u Volkswagen Golf’ni ukasi bilan Germaniyada yashagan vaqtida to‘plashni boshlagan. AQShga ko‘chib o‘tganidan so‘ng, ular avtomobillarni o‘zlari bilan olib kelgan va kolleksiyasini to‘ldirishni davom etgan. Hozirda erkakning 6 nusxa birinchi avlod Golf GTI’si mavjud. Nemis markasining mashhur modeli 1976—1983-yillar oralig‘ida ishlab chiqarilgan. Shuningdek, Smitning orqa hovlisida markaning karbyurator benzin dvigatelli so‘nggi xetchbekiga aylangan ikkinchi avlod Golf’i ham bor.
Aka-ukaning kolleksiyasidan o‘rin olgan eng noyob model — modifikatsiyaga uchragan ikkinchi avlod poyga mashinasi. Golf Rallye 1988-yildan 1990-yilga qadar ishlab chiqarilgan. Nemis konserni bu turdagi “o‘qlangan” nusxadan jami 5 mingta yaratgan bo‘lib, ularning 15 tasi AQShda. To‘liq uzatmali xetchbek 160 ot kuchiga ega 1,8 litrli benzin dvigatel bilan jihozlangan bo‘lib, mexanik uzatmalar qutisi yordamida boshqariladi. Mashina soatiga 100 kilometr tezlikka 8,6 soniyada erishadi.
Ayni vaqtda aka-ukaning kolleksiyasidan 17 ta Gold o‘rin olgan, biroq ularning ayrimlarini holati achinarli. Erkaklar muhandis-mexanik bo‘lib ishlaganliklari sabab, ular sotib olingan mashinalarini o‘zlari mustaqil ta’mirlab keladi. Kolleksionerlar xarid qilingan barcha xetchbeklarni ideal holatga keltirishni rejalashtirmoqda.
Avvalroq Volkswagen kompaniyasi e-Golf elektroxetchbekini buyurtma qilgan mijozlarga yangi xizmatlarni taklif etishi ma’lum bo‘lgandi. Endilikda xaridorlar Drezdendagi konveyrga kirishi va 215 yevro evaziga o‘z mashinasining yig‘ilishini tomosha qilishi mumkin.
Izoh (0)