Navoiyda Matiz ag‘darilib ketishi natijasida haydovchi halok bo‘ldi
Navoiy viloyati Navbahor tumanida Matiz ishtirokida yo‘l-transport hodisasi sodir bo‘ldi. Nurota tomondan tezlik bilan kelgan Matiz haydovchisi boshqaruvni yo‘qotishi natijasida ag‘darilib ketgan, deya xabar bermoqda YHXBB.
Ma’lum qilinishicha, 2020-yilning 5-dekabr kuni Navbahor tumani “Mirzo Ulug‘bek” mahallasi hududidan o‘tgan 4R-57 Qizilqum halqa yo‘lining 10–11-kilometri oralig‘ida Nurota–Navbahor yo‘nalishida harakatlanib kelayotgan Matiz tezlikni me’yoridan oshirgan. Natijada mashina yo‘lning chap qismiga chiqib ketib, YTH sodir etgan.
YTH natijasida 1990-yilda tug‘ilgan Matiz haydovchisi voqea joyida halok bo‘lgan.
Holat yuzasidan Navbahor tumani IIB Tergov bo‘limi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq Ishtixonda yo‘lni belgilanmagan joydan kesib o‘tayotgan piyodani urib yuborgan Nexia uning o‘limiga sabab bo‘lgani, Sergelida “moyka” ishchisi o‘ziga topshirilgan Nexia’ni yo‘lga haydab chiqib, YTHga uchragani hamda Farg‘onada Nexia kelib urgan Damas haydovchisi shifoxonada vafot etgani haqida xabar berilgandi.
