O‘zbekistonda internet foydalanuvchilari soni 22,1 milliondan oshdi

O‘zbekistonda internet xizmatidan foydalanuvchilar soni 22,1 milliondan oshdi. Shundan mobil internet foydalanuvchilari soni 19 million kishini tashkil qilmoqda. Bu haqda AKT vazirligi matbuot kotibi Sherzod Ahmadov 11-dekabr kuni bo‘lib o‘tgan matbuot anjumanida ma’lum qildi.

Vazirlik vakilining ma’lumot berishicha, O‘zbekiston bo‘yicha aholi punktlarining mobil aloqa bilan qamrab olinishi darajasi 97 foizga, mobil internet qamrovi esa 87 foizga yetgan. 2020-yilning dekabr oyi boshida maktablarning 70 foizi va sog‘liqni saqlash muassasalarining 78 foizi internetga ulangan.

Shuningdek, operator va provayderlarga internet xizmatlari uchun tarif 2019-yilning shu davriga nisbatan 36,1 foizga arzonlashtirilib, 1 megabit/sekund uchun 45 ming so‘mni (4,3 dollar) tashkil etdi.

Bugungi kunda xalqaro internet tarmog‘iga ulanishning umumiy o‘tkazuvchanlik qobiliyati 1200 gigabit/sekundni tashkil etmoqda.

“Optik tolali aloqa liniyalarini qurish” loyihasi doirasida rejalashtirilgan obyektlargacha 19 ming kilometr optik tolali aloqa liniyalari qurilib, ularning umumiy uzunligi 55,6 ming kilometrga yetkazilgan.

Eslatib o‘tamiz, Prezident Shavkat Mirziyoyev raisligida 2020-yilning 11-may kuni raqamli iqtisodiyot va elektron hukumatni keng joriy etish masalalari bo‘yicha o‘tkazilgan yig‘ilishda 2020-yilda O‘zbekistonda optik tolali aloqa qamrovini maktabgacha ta’lim tizimida 41 foizdan 100 foizga, xalq ta’limida 40 foizdan 70 foizga, sog‘liqni saqlash sohasida 38 foizdan 100 foizga yetkazish vazifasi belgilangani ma’lum qilingandi.