Vazir Qashqadaryoda suv sarfi ko‘pligini Prezident tanqididan oldin bilganini, ammo tayinli ish qilinmaganini tan oldi

Prezident Shavkat Mirziyoyevning Qashqadaryo viloyatiga tashrifi chog‘ida faoliyati tanqid qilingan suv xo‘jaligi vaziri Shavkat Hamrayevning matbuot kotibi “Daryo”ga murojaat qilib, vazir 2020-yil 17-noyabr kuni Qashqadaryoning Nishon tumanida jurnalistlar bilan muloqot qilib, tanqiddan keyingi xulosasi haqida gapirib bermoqchiligini ma’lum qildi.

Vazirlik axborot xizmati taklifiga ko‘ra, “Daryo” muxbiri Nishon tumanida bo‘ldi.

Vazir aytilgan manzilga kechikib kelgani yetmagandek, nafaqat xodimlariga, suhbatga taklif qilingan jurnalistlarga ham qo‘pol munosabatda bo‘lib, atrofdagilarini tilga olib bo‘lmas so‘zlar bilan haqoratlagan. Eng yomoni, savollarga ham aniq javob berishdan tiyilib, gapni olib qochgan.

OAV vakillari bilan suhbat qilish tashabbusi bilan chiqqan vazir “Daryo” muxbirining “Vazirlik Qashqadaryoda suv sarfi ko‘pligini, Prezident tanqidiga qadar ham bilganmidi? Agar bilgan bo‘lsa, qanday munosabat bildirgan?”, degan savoliga vazirlik bilganini, ammo tayinli ish qilmaganini aytgan.

“O‘zimiz buni avvaldan bilgandik va doim aytib kelganmiz, — deydi viloyatda suv sarfi ko‘pligini avvaldan bilganini ma’lum qilgan vazir. — Biz bir yil oldin ishdan ketgan yoshi katta havza boshqarmasi boshlig‘ini direksiyaga rahbar qilib qo‘ygandik. Prezidentimiz yosh kadrlarni ishga olish kerak deb buni ham tanqid qildi. Aslida bir viloyat ikkinchisiga o‘xshamaganidek, ikki tuman ham bir-biriga o‘xshamasligi mumkin. Lekin bir holatni inobatga olish kerakki, Farg‘ona viloyatining tumanlarida ilgari suv sarfi ko‘p bo‘lgan, endi kamaydi. Shuningdek, Qashqadaryoda yer egalari irrigatsiya va melioratsiyaga mablag‘ sarflamaydi. Faqat ber deb turadi. Shu sabab bunday holat yuzaga kelgan. Mana shu holatlarni ko‘rib, agroinspeksiya bilan birga jarimalar qilganmiz, ba’zilarini prokuraturaga berganmiz, ba’zilariga esa suvni yopib bermay qo‘yganmiz. Lekin bu natija bermagan”, — dedi suv xo‘jaligi vaziri Shavkat Hamrayev.

Eslatib o‘tamiz, Prezident Shavkat Mirziyoyev Qashqadaryoga tashrifi davomida viloyatdagi ekinlarni sug‘orishga 20-25 foiz ko‘p suv sarflanganini aytib, suv xo‘jaligi vaziri Shavkat Hamrayev jamoasini tanqid qilgandi. “Suv xo‘jaligining na birorta rahbari bor, na o‘z ustida ishlashi bor, janob Hamrayev, na fikri. Yuribsan bu noinsoflar bilan suv xo‘jaligiga katta-katta binolar qurib. Umring uzoq bo‘lmaydi, agar Qashqadaryoda Qoraqalpog‘istonda aytgan narsang bo‘lmasa. Menga qorovul bo‘ladigan vazir kerak emas”, degandi.