Olti yoki yetti kosatkadan iborat to‘da Portugaliya qirg‘oqlari yaqinidagi kemani qurshab olib, unga ikki soat davomida hujum uyushtirgan, deb xabar beradi Newsweek.
Foto: News Break
Oktabr oyida britaniyalik yaxtsmen Devid Smit kemani Fransiyadan Gibraltarga olib kelmoqchi bo‘lgan. Portugaliya qirg‘oqlaridan 30 kilometr narida 13 metrli yaxta oldiga olti yoki yettita kosatka (qotil-kitlar nomi bilan ham mashhur) suzib kelib, kemani qurshab olgan.
“Meni qo‘rqitish oson emas, lekin bu chindan qo‘rqinchli edi. Asosan yosh kosatkalar — eng kichkinalari faol edi. Rul chambaragi har to‘qnashuvda juda tez aylanardi”, — deydi Smit.
Jamoa sun’iy yo‘ldosh telefoni orqali portugal qirg‘oq qo‘riqchilari bilan bog‘langan va sodir bo‘layotgan voqeani ma’lum qilgan. Ularga motorni o‘chirib, yelkanlarni tushirishni tavsiya qilishgan.
Yaxtsmen o‘sha vaqtda, ayniqsa, kosatkalar rul balleri nomli kema qismini siljitib yuborishidan xavotirga tushgan. “Agarda u siljib qolganida, bizni haqiqiy muammolar kutib turardi. Men portugal qirg‘oq qo‘riqchilaridan bizni evakuatsiya qilish uchun vertolyot jo‘natishlarini so‘rashga tayyor edim”, — deydi u.
Oradan taxminan ikki soatlar o‘tgach, kosatkalar kutilmaganda suzib ketgan.
Ushbu ko‘ngilsiz hodisa — so‘nggi yarim yilda kemalar va kosatkalar o‘rtasidagi 40 ga yaqin sirli “uchrashuv”ning biri hisoblanadi. Okeanologlar hamon kosatkalar kemalarga nima sababdan hujum uyushtirayotganini aniqlashga urinmoqda — bunga qadar bu kabi holatlar juda kam uchragan.
