Avstraliyada bir nechta kosatkalar bukri kit bolalarini o‘ldirdi, deb yozmoqda ABС. Bu dengiz ekskursiyasiga otlangan odamlar ko‘z o‘ngida sodir bo‘ldi.

Foto: Pixabay

Voqea Yangi Janubiy Uelsning Ballina sohili yaqinida yuz bergan. Kema kapitani Din Fuksning so‘zlariga ko‘ra, erkak va urg‘ochi bukri kit o‘z bolasi bilan birga ularning qayiqlari yaqinida suzayotganida to‘satdan kosatkalar to‘dasi qurshab olgan. Unda qariyb 30 ta kosatka bo‘lgan.

Ular kit bolasini ayirib olishga erishgan. Ekskursiya ishtirokchilaridan biri Juli Kammingsning aytishicha, kosatkalar kit bolasiga sakrab, nafas oladigan teshikni berkitib, deyarli butunlay bo‘g‘ib qo‘ygan.

“Kit bolasini oxirgi marta ko‘rganimizda u to‘nkarilib suzar, og‘zidan qon oqardi. Shunda kosatkalar ovni muvaffaqiyatli amalga oshirganini tushundik”, — deya xotirlaydi Kammings.

Kitning ota-onasi bolasini qutqarishga uringan, ammo kosatkalar juda ko‘p bo‘lgan. Ular kit bolasini yeb, 2 soat davomida kema atrofida aylanib yurgan.

Kammings bu voqea hali uzoq vaqt esida qolishini aytgan. “Bu juda achinarli, shu bilan birga hayratlanarli edi”, — degan u.