Dunyoning turli millatlariga mansub qizlar to‘yi kuni qanday libos kiyadi? (foto)

Nikoh to‘yida kelinlarning qanday libos kiyishi haqida maxsus qoida yo‘q. Har bir qiz o‘z xohishiga ko‘ra libos tanlaydi. Quyida dunyoning turli burchaklaridagi millat va urf-odatga ko‘ra tanlangan kelinlik liboslari bilan tanishasiz.

Livan

Livanlik kelinlar shleyfi uzun va og‘irligi bo‘yicha rekordni yangilaydigan liboslarni tanlashni xush ko‘rsa kerak. Libos qimmatbaho toshlar, yubka qismi keng hajmda, qo‘l mehnati bilan naqshlangan korset, marvarid va olmos taqinchoqlar bilan boyitiladi. Bu livanlik kelinlarni boshqalardan ajratib turadigan asosiy belgilardir.

Turkiya

Turkiyalik kelinlar ham livanliklardan qolishmaydi. Ushbu mamlakatda ham to‘ylar keng miqyosda nishonlanadi. Qizlar to‘y uchun malikalar libosini tanlaydi. Shuningdek, turk kelinlari chiroyli soch turmagi, zargarlik buyumlari, alohida urg‘u beradigan pardozga ahamiyat qaratadi. Ularning aksariyati bunday baxtli kunini qizil rangli libosda ham kutib olishni yaxshi ko‘radi.

Hindiston

Hindistonning to‘ylari haqiqiy bayramga aylanib ketadi. Oltin ip, kashta, qimmatbaho toshlar, marvarid, kelinlarning yorqin rangli sarisi. Bundan tashqari, kelinlarning xinalari ham boshqa davlat kelinlarida uchramaydi. Taqinchoqlar burundan tortib oyoqqacha taqiladi. Hindistonlik kelinlar boshqalardan ajralib turishi uchun juda ko‘p harakat qilishi kerak. Shuningdek, hind kuyovlari ham bu borada kelinlardan qolishmaydi.

Shvetsiya

Shvetsiyalik kelinlar dabdabaga intilmaydi. Ularga oddiy, ko‘zga tashlanmaydigan va qulay oppoq libos bo‘lsa bas. Kelinlar shu libosida ham ko‘chada bemalol yurib ketaveradi. Shvetsiya to‘ylari juda kichik va kamtarona tarzda nishonlanadi. To‘yga tashrif buyurganlar sovg‘a ulashmaydi, shunchaki kelin va kuyovga yaxshi tilaklar bildiradi.

Yaponiya

Yaponiyalik kelinlar to‘y davomida uch marotaba kelinlik libosini o‘zgartiradi. Birinchisi, gullar, marvarid va tilla kashtalar bilan bezatilgan oq kimono. Ikkinchisi, har xil rangli kimono, uchinchisi esa Yevropa uslubidagi to‘y libosi.

Nigeriya

Nigeriyada kelin va kuyov bir xil rangda libos kiyadi. Albatta, shunda ham kelinning libosi murakkab dizaynga ega. Kelin to‘y kuni kamida ikki marotaba libosini o‘zgartirishi kerak. Agar uning liboslari chiroyli va hammani hayratda qoldirgudek bo‘lsa, to‘y shuncha muvaffaqiyatli hisoblanadi.

Fransiya

Fransuz ayollari kelinlik libosining nafisini afzal deb biladi. Ular juda ham murakkab bo‘lmagan ko‘rinishdagi libosni tanlaydi. Shuningdek, hashamdor soch turmagidan ham qochadi. Pardozni ham ortiqcha bo‘rttirishlarsiz amalga oshiradi.